Showing posts with label Article. Show all posts
Showing posts with label Article. Show all posts

Hrethiam Ve Se Chu Aww..

5:57:00 AM Noddy , Posted in , 4 Comments

          A vawt ka tih vangin khumah ka mu meng kar reng a. Chutihlai chuan ka mobile phone a lo ri ral ral a."Kan bawng thlun kha a bo daih a nia, lo phei ve vat teh" Chu thu ka hriat rual rual chuan vawt ka tih reng ka hre tawh lo, hmanhmawh taka inha lumin ka zuang tho nghal hi a ni ber mai a. Nizan lama kan bawng thlunna lam pan chuan hmanhmawh takin ka phei ta nghal a.
        
          Kan bawng thlun kha kan veng Krismas ruai a talh tur, farm pahnihin karhnih chhunga kan invulh chhawk tur Agriculture Farm lamin an vulh hun chhung a tawp a, keini Horticulture Farm in kan vulh ve hun a nih vanga nimin lama kan va kaih phei chauh a ni lehnghal Ka rilru-ah thil hrang hrang a lo lut a. A bo vaih chuan a va zahthlak dawn em.. Kohhran mipui hma-ah kan hmai a uang hauh lovang le. Tin chawi hial pawh a ngai maithei a ni tih te thlengin ka rilru-ah a awm nghal a.

       A hma zan lama kan thlunna hmun chu ka va thleng phei a. Inti detective takin a  hniak vel chu kan en a. Nghet takin kan thlung ni a kan hriat kha talna hnuhma pawh awm lovin a bo hawl mai niin a lang a. A thlanglam hnim vel kan en lah chuan a kalna hnu awm reng reng ka hmu bawk si lo. A bangbo theih ngei mai. Mahse thil pakhat chiang deuh chu a thlang ram lama a kal vaih chuan kan inzawng fe chung pawhin kan hmu zo lo mai ang tih hlauhawm tak a ni a. Amaherawhchu kawngpui lama a kal hlauh a min an lo kai daih a nih loh chuan hmuh leh mai a awlsam deuh zawk ngei anga. Chuti a nih lohva misual tuin emaw a lo kai daih a nih vaih chuan chan hlen mai theih a ni bawk si.

       Kan han sawi ho a, kawngpui lama zawn tawp phawt mai chu fuh berin kan hria a. A zawng tura kan insiam lai chuan Agriculture Farm lam atang chuan bawng chhuak an thlun thu kan hre ta hlauhva, hmanhmawh takin kan va kal nghal a. Kan bawng bo ngei a lo ni hlauh, a va tihzia tak em. Rilru a hahdam ta huai mai.

       Mahse tizawng hian ka ngaihtuah ta tlat mai a. An nun an hlan loh chuan kan hlim zo ve ta lo. An tello chuan kan hunpui hmuah hi a kim zo ta tlat lo mai. Tawrhna nasa tak a thleng dawn tih in hrethiam ve se chu aw... engtin chuan ngai ang maw..Pian loh zawk pawh an duh ve rum rum ngei ang le.. 

        Amaherawhchu Ani chuan engkim hrelawk vekin kan tan a lo piang a. Vankhawpui an committee pawh khan kal tur an inhmu zo lo mahse kan tana zalenna inhawng tur chuan a fapa mal neih chhun a rawn hlan ta. Kan tana thi khawp hiala a tawrh tur pawh hre lawk chungin a lo piang dawn ta. He hun hi engtiang a lo hmuah nge i tum ve le??

Note : Ka Blog min rawn tlawh sak thin tute inzavaiin Krismas leh Kumthar Chibai vek u le..
          

Lasi hi an lo awm tak tak ?

1:57:00 AM Noddy , Posted in , 15 Comments

Tunlai chu blog ka update tha phian mai. Hun thawl ka ngah vang ngemawni dawn ni thu fahrah te te hian ka rilru hi an luah a. Hei pawh hi kan dahchhuak ve leh tawp mai a nge..A lo ninawm a nih pawn min lo hrethiam mai teh u. Phur deuh laia ziah zel mai loh chuan ka khawro ve thei em mai.


Engtik kum nge ka hrechiang ta lo khan kan thian pathumte chu Sawleng khuaah thirsakawrin an han leng a. Sawleng khaw dai a awm siktuithiang chu tlai lamah an rawn tlanpel a. Khatihlai kha chuan helai hmun hi ala ngaw tha hle mai a. Siktuithiang tih takah tui pawh a vawt tui thei khawp mai. Thing leh mau ten an hliah that avangin chhun lai pawn a hmun vel hi chu a dai nuam thin khawp mai a. 

Thirsakawra kal an nih vangin a ruala rawn tlan lovin an rawn inzui thla a, an zinga pakhat chu a rawn hnung fal deuh bik a. Ngaihthat lohna em em pawh nei chuang lovin an thianpa hnung fal deuh pawh chu nghahzai an rel chuang lova. Khua an thlen thleng pawh a alo la lan ve theih tak si lovah chuan khaw daifemah an lo nghak ta ringawt a. Rei fe an nghah hnu chuan a rawn lang ve ta nge nge a. Mahse, a hmel an han en chuan thil dik lo a awm a ni tih hai rual a ni lo. A dawldangin a thlaphan hmel em em mai a. An zawn a rawn thlen pawh chuan ding chuang lovin a tlan tlang ta mai a. Anni ngaihthalo chuan au chungin an um zui ta a. Thui vak lovah chuan nangchingin an va pawt ding thei ta a. 

Engtiziange tia an han zawh chuan hlauh hmel leh thlabar takin a chanchin chu hetiang hian a hrilh ta a. "Siktuithianga motor an silna thin zawn ka rawn thlen khan hmeichhe pathum hi an lo awm a, min lo phar ding a. A varin an inthuam a. An ni chuan engmah vak sawi lovin 'Kha hei hi phur rawh' min ti a. Thirsakawr hnungah hian engngemawni chu an dah a. An bo leh ta daih a. Ka hlau lutuk a engnge an dah  pawh en ngam tawh lovin ka rawn tlan char char ringawt" tiin khur chungin a chanchin chu a hrilh a. A thiante chuan an han en chuan buara chhia huh deuh hnup mai hi a lo phur reng mai a. Mak an tiin Lasi a ni ngei ngei ang an ti ta ngawt a. A hmutu ber lah a hlauh em vangin zawh zel chi a ni tawh bawk si lo. Hemi hnu hian zan pawh a mut that ngam loh vangin tlangval tlawmngai ten kar khat chhung vel lai mai chu an riahpui ta ringawt mai a ni.

Heng zawng zawng hre reng chung hian ka nau nen zankhat chu tui kan neih loh vangin chawi turin Gypsy-in kan thawkchhuak dun ve ta a.Chhun lamah chuan motor chawi an tam deuh thin vangin tui a tam lova. Chuvangin zan lam hi tuichawi dawn chuan hun tha ber a ni tlat a ni. Keini pahnih tlangval inti huaisen vel chu chhungten 'Lasi in han hmu ve mai angah' tiin min fiam vel lah chuan 'Lasi a lo awm hlauh leh sawi ve reng rengah kan han hmu ve a nga ni mai a lawm' te kan ti vel ham ham a.

Zan tir lam chuan a hlimawm viau, zan dar hnih vel bawr a kan han kal leh chu a boruak a dang ta daih mai. Tui han pipe thla tur a kawr luh chhoh te kha a nuam ta miah lo mai a. Khua lah chu aimitthlawn an sawi ang vel ni ngei tur hian a thim chhah em em mai a. Light han chhit en reng dawn chuan battery a down palh ang tih a hlauhawm bawk si. Kan unau chuan tui pipe khah chhung zawng mai chu rei ti tak leh inbe em em lovin kan nghak dun ta tlawk tlawk mai a. Lasi lam reng reng chu kan sawi tawh lova. A lo awm tak tak mai ang tih kha kan hlauh dun ber chu niin ka hria. Mahse, kan vannei a ni ber ang chu engmah chu kan han hmu ta lo hlauh a.

Hengte avang hian  Lasi hi a lo awm tak tak lo nge a hmu thei bik riau hi an lo awm zawk le ti a ka ngaihtuah tak chu ni. Mi sawi ka hriat dan chuan hmel lamah pawh tha kan tih lem loh te hian Lasi hi an hmu thei riau an ti a. Chutia Lasi hi a lo awm tak tak a nih ngai a, hmeltha vak lovin an hmuh theih riau chuan keini unau ve zawng hmel lamah chuan rual kan pawl tihna ni hmiang maw....lol.. Engpawhnise, Lasi hi an lo awm tak tak ngei em? Awm tak tak ta se a hmuthei bik riau an awm  em ni le? 
   

I Tlakna Tur En Hmasa Rawh

10:20:00 PM Noddy , Posted in , 6 Comments


August thla chu kan hmang zo a ni leh dawn ta mai. He thlaah hian ruahtui ten leilung an tihnem tawh vang hian  lei a min sam em em a.. Fimkhur ngaih hun lai a ni a. Chanchinthar lamah pawh leimin hriat tur a awm leh tan ta. Mahse, kumin hian kum dang zawng aiin ruahtui kan dawng tlem deuhvin ka hria. Chuvang chuan kan min nep deuh turah ngai ang.

Engpawhnise, ka sawi duh leh tum zawk tak chu leiminin kan chenna in  te a hnawl/ lungtla in a delh tih thu hriat tur a awm hi chu a pawi thin a ni. Vanduai vanga kan tawh tam tak hi chu a aw na meuh mai mahse ka ngaihdanah chuan tam tak hi chu kan pumpelh thei a ni. Head Hunter tih takah kan huaisen dan hi a tha lo lam zawng te pawh hian kan hmang thin em ni pawh a tih theih. 

Awih pangper leh remchang vak lo ah pawh In kan han rel a. Han en reng reng pawn ko chhak lam chu vanduai mangkhawng ang maiin tawlh an chak em em tih lang reng te kha kan haider lui tlat a. Eng em a ti lovang tiin kan han inhnem chawp a. Thenawmpa, te kan han rawn ve ngei a, anni lahin kan pawisawi duh loh vang in kan rilrem tur zawng takin a hlauhawm lem lovang an han ti liam ngawt a, an chenna tur ni zawk se a dan a dang maithei a ni. Chu chu ringin kan han sa lui a. Kum te a lo vei zel a, min min hnan ta. Ka phu tawk ka hmu a nih hi ti duh leh mang silovin kan vanduai ngei mai kan han ti leh daih te hi chu a inhmeh thlawt lo. Chuvangin kan zuan hmain kan tlakna tur enlawk phawt hi a finthlak ka ti thin. 

Chakai Meichher Chhit

12:18:00 AM Noddy , Posted in , 16 Comments

Mahni vei zawng zawng sawi hian phul leh hlut thin ila a ni mai. Ziak mi han nih a ngaihnawm deuh zawk a nunhlui han thaichhuah pawh a chakawm viau laiin chutiang chu ka ni der si lova.Anih ang ang hian dah ve leh tawp mai teh ang. A lem awm hi a zia awm deuhvin ka hria. Chuvangin Internet lama mi hi kan dah mawi ve mai mai a nge..

Chakai khawrh, meichher chhit etc. hi nuam ka ti ve thin khawp mai a. Nikum hmasa lam phei kha chuan kan awmna atanga hla vak lovah mahniin chakai meichher chhit turin ka chhuak ve rawih mai a. Tlai lamah scooter-in link road lam  tluang zawhin iptepui leh ka mamawh tlem a zawng nen kawng biboh karah kan insawh thla ve nawk nawk a. Kawng sir remchang laiah ka innghat a.Hnim pik te tawn kaw chawpin ka chhitna tur hmun chu lui hnar lam atangin ka zawh thla ta a. Zawh thlak pahin chakai duhzawng deuh ni a min an sawi Broiler chaw chu a rem lai laiah ka theh thla pah zel bawk a. Ka duhtawk chin ka thlen chuan khua nghak thim turin mei te chhemin ka innghat ta a.

Khua a thim dawn ruai tawh ang tih chuan ka thlang lawk tui khuah atang chuan rul lian tawk hi rawn chhuah tumin a rawn lawr ta zuau zuau mai. Kei a rul hlau tih takah tihngaihna vak hre lo chuan ka meichhem lai thingthu nung chuan kan vawm ve pawp mai a. A hlau bawk a niang a pil leh a a reh ta vang vang a. Ka piah deuh ah chuan hmawng kung sang deuh zuih mai a ler lam buk tawi laih chu a awm bawk a. Khua lah chu a thim har hi ka ti tawh khawp mai a. Chu hmawng kung chu ka thlir dauh dauh mai a. Ka ngaihtuahnaah chuan ramhuai an tih ang chi emaw bawmpek an ti zawk emaw ni te tan chuan chulai thing kung chu nunchan zir nan hian remchang awm hle hian ka hriatpui a. Chutia ngaitha lo deuh a ka thlir reng lai chuan ral khat atang hian thawm ka hre ta. Lo feh haw tlai fal deuh ni ngei tur zai al al thawm a ni tih kan hria chu ka thaw  huai mai a. 

Hlauh nei lo chu ka ni bik miah lo. Ka awm tinuam lo tu deuh chu chulai thingkung ka hisap ta vak chu ni berin ka hria.  Mahse engmah han hlauh tur chu ka hre chuang hlei lova. Khua nghak thima ka thut pah chuan eng eng emaw ka ngaihtuah kual a. Kan naupan lai a kan thianpa pakhat nen a chakai meichher chhit kan tum ve tum te ka ngaihtuah thleng a. Rampalailengah tuma lawm lohvin ka nui chhuak vur vur mai a. Chutih lai min hmutu chu awm se chuan mi a emaw min ti ngei ngei ang

Tumkhat chu Class-IV kan zirlai hian ka thianpa pakhat nen hian kan tuichawi thinna tuikhur mawngah chakai meichher chhit ve tumin kan insiam ve a. Kan tuikhur hi khua atang chuan km 1 leh a chanve vel chu niin ka ring. School ban veleh ka pa hnenah chuan kan tum dan chu ka sawi a. Ani lah chuan in kal thei lovang tiin min lo hnial nasa mai a. Anih leh ka rawn kal ve a nge te a la ti tak deuh deuh a. Kei lah chuan a rawn kal ve kha ka duh der mai si lo. Chutia tum lui ta tlat chu chaw te fun ula a tih pawh chuan ka duh chuang lo. Ka ril a tam tlat loh avangin a ngailo ka la ti ta zel a. Mahse, chaw tel lo chuan kan chhuah a phal tak loh avangin min fun luih sak ta a. Meichher tur pawh chu in siam thiam lovang a ti a, amah chuan mau a zawng a khawnvartui min thun sak a, chhit mai tur in min peih sak ta diam zawk a. A tihdan tur te min hrilh a, ipte nen nawalh nen chuan thianpa te inlam pan chuan ka in ak chhuak ta a.

Kan phur dun bawk a, tha tho tawkin dai lam pan chuan kan inak chhuak dun ve ta hnak hnak mai a. Khua atanga hla vak lo kan thlen chuan kan meichher ken chu a alh thei dawn em tiin hal chhin kan chak ta tlat mai. Ka ipte atang chuan nawalh chu kan phawrh a. Kan han dep kai ta a. Alo alh thei na meuh mai a. Tihhlum leh kan tum pawh chuan kan beidawng der a ni. Lei vuak nan kan hmang thul, A chang leh kan han rap, kan thing vak vak bawk a. Kan sawisa nasa ta deuh a niang a mau bur pawh chu kan tih keh then ta. Mau keh lai sir atang te chuan mei alh chu a lo chhuak ta zel mai si. Vanneih thlak deuh maiin a hnawhna (phita) chu mau atang chuan a tla chhuak ta hlauh mai. Kan hlauthawng dun nasa mai a. A hnawhna tla chhuak kha a la alh  nasa mai bawk sia. Ngam leh ngam lovin kan tum hlum thei ta a. Mau chhung kan han en chuan khawnvartui tihtham a lo awm ta bawk si lova. Nui hawk hawk chungin inlam panin kan haw leh ta ringawt a. Chhungte kan han hrilh chiah chu an nuih a za ngei mai. Chutiang vel ngaihtuah chuan khawhar lutuk lovin khua pawh chu ka nghak thim ve ta a.

 Khua a thim fel ta maw tihah chuan ka insiam a, meichher te ka chhi kai a, luidung chu ka zawh chho tan ta a.  Chakai sa hi ka ei duh vak pawh a ni lo nuam ka tih vang in ka zuk chhit ve mai mai hi a ni a. Naupang leh hmeichhe sa an tih a bawppui tih loh hi chu ka ei tui vak hlei thei meuh lo. Tumkhat KTP in bial dang kan tlawh tumin chawlhni a an chakai sa min hmehpui kan thian dun a ei har kan tihzia te min ti hrechhuak rum rum mai a ni.

Ka rinai takin chakai pawh an lo lian a. Chhungtlai chu ka hawn ve ta hlauh a. Fate ho lah chuan an lo lawm phian a. Bucket a kan dah chu an khai kual deuh sek mai bawk a. A hlimawm ve duh angreng khawp mai. A tuk zing a nu ber chakai chhum tum kei Inti ramkal hah tak mai a khumlai zawla mumang rama ka chen veng veng lai a ani chakai man ngam si lovin min han kai thova. Mahni mansa mahni bawkin ka han chhum leh takah chuan chakai meichher chhit pawh hi tihfo chi niin ka hre ta meuh lova. Chuta chin chu chhit lova mi mansa lo leisak mai hi a hah dam ta ber a ka hriat avangin ka chhit duh ta lo reng reng a......

Khawihli Damdawi

3:33:00 AM Noddy , Posted in , 21 Comments

 

Khawihli vei hi a lo nuam lo ang reng khawp mai. Tunhma deuh kha chuan ka vei leh mai thin a mahse tunhnu ah erawh ka nei ngai ta lova. Engvanga lo awm nge chu ka hre chiah lo na a Vitamin B Complex regular deuh a ka ei vang khan ka nei ngai ta lo ni ber in ka hria.

Ka pa damloh avangin vellore-ah kan kal a. Chumi tum chuan khawihli kha pathum ngawt mai, ka ke zungpui leh ka mawngtam sir ah leh ka kiu ah tak mai hian ka nei a. Ka pa lah kha damdawiin CMC&H ah admit a ni bawk si. Kan pahnih chauh kan nih avangin kan thlenna lodge leh damdawiin kha mamawh lamin ka kar tawn a ngai bawk sia. Auto-rickshaw a kan chuang ve te kha mawng lehlam chauh a thu in ka ke kha min rah sak ang tih ka hlau bawk nen ka kiu veng tut chungin ka thu ve thin a. Ka bula thu te chuan mak min tih hmel thei thin khawp mai.

Damlo kalpui ta chu hrehawm sawi chi ni hek lo le dam awm a awm a ngai a.. Damdawi ei loh in a tha ber an tih kha ka hre reng mai sia. Nachhawkna takngial pawh ei lovin a hlangin ka tuar ta ngawt ngawt mai a, a chang phei chuan khua te kha a ti sik deuh thin in ka hria.

Damdawiin a awm ta chawt chu a hnai tlem a lo chhuak tan tih khan nurse hnenah a tuamna tur/a hnai hrukfaina tur vel ka dil a. Ani chuan min lo ensak a. Tlem chu min hnai sak a. Damdawi eitur lam pawh sawi lem lovin aieng leh 501 sahbawn pawl deuh chi kha met thla la, chu chu chawhpawlh hnuah a hmuamhma laiah hian bel la, a dam huai mai ang a ti a. Thildang hnawih tur hriat loh aiah awih lo leh ring chiah lem lo chungin min hrilh ang chuan ka ti ta a. Mahse, a lo tha phian mai a. Ka hnawih hnu atang chuan a tawrh pawh a nuam in a dai deuh veng veng hian ka hria a. Chuta chin chu vawikhat emawni chu khawihli hi ka nei leh a. Ka sawi tawh ang khan Vitamin B Complex chu ka ei ta char char mai a. Ka ei vang kha nge ka hre chiah lo na a tunthleng hian khawihli hian min ti buai leh ngai ta lo a ni.

Zirlai Pawimawh

11:53:00 PM Noddy , Posted in , 5 Comments



       Hreipui pu chungin min rawn pan zel. Min endan lah chu a rum zek lehnghal. Ka bul a rawn thlen chuan chhak lam kawh pahin “Khilai a thing khi ka kit dawn?” a rawn ti teh hawl a. Kei lah chuan “Khawia thing maw?” tiin ka lo zawt let nghal a. Ani lah chuan zam map lo thinur aw lek lek in “Khi..khilaia Kangtek khi..Ka ram a nia, ka kit dawn” thupe aw lek lek zawk mah hian min rawn tih khum ta mai . Chhan mai ngaihna pawh ka hre lo. Kan ram chhung (Sawrkar ram) a ni tih ka chiang ropui mai si. Awka vin deuh a ka chhan dawn chuan inhnial a cho tih ka hrereng mai si a. “E!! i thu a lawm le!” tiin bung ang reng deuh in kan chhang ta ngawt pek a. Ka rilru tak chuan a tih ngam ka ring miah lo. A tum ber chu min rawn tih thinur kha ni ber in ka hria. 

       Kum lamah chuan kei aiin a u zawk tih chu ka hria. Chuti ni lo sela chu ‘I duh duh ka duh’ han tihpui nghal na  mai tur khawp a tawngkam dengkhawng a rawn chhakchhuak tlat! Han sawi zui zel tur kan van dun khawp mai. A beisei loh deuhva ka lo chhan vang kha ni maw. Ngawi rengin engngemaw chen chu kan han ding dun ran mai a. A hreipui put lai chuan min hem chawrh ang tih ka hlauh deuh vangin ka hnung chhawn mai duh bik lova. Chutah, a inher a a kal ta mai a. ‘A kit ngam miah lovang, a tawng dan atang reng khan min rawn chhaih kual vel a tum mai mai a ni’ ka ti rilru a. Engngemaw chen hnu ah chuan Kangtek thing a kawh ngei mai kha a chek ta chawrh chawrh a ni tih ka han hmu ta! Heti a nih chuan buaina chu ka pumpelh thei dawn ta lo tih ka inhre chiang ta khawp mai.. Engpawhnise, han kal nghal a ngai tlat. A kih tluk tak tak chuan a hnuaia thlai leh thirhrui (Electric hrui) a vaw chhe ngei ngei a nga. Thil pawi zawk a thleng dawn tlat a ni. Ralkhat atang chuan cheh paha alo hawi thla leh thin pawh ka han hmu thei a. Engtinnge ka tih dawn tih a hre chak tih a lang reng mai a. 

       Hmanhmawh vak lo anga lang in hman hmawh ru ang reng deuh si chuan a awmna lam chu ka pan chho ve ta a. Ka han thlen chuan a lo sat rek ngut hman tawh a. Duhtawk tur a kan ngen chuan helai ram buai lai hi a ram ngei a nih thu te min lo hrilh nghal a. Chuvang chuan thing pawh kih ngei a tum a ni. Heta a hriat loh em em chu kei ni (Sawrkar) chuan patta fel takin kan nei thlap a ni. Ani chuan a pu te ram hlui tih vel kha a tan chhan chu a nia. Mahse, a neitu angah a inngai miau sia kan buai phah ta a ni ber mai.

A thil tih pawi theih dan tur te tha taka kan hrilhfiah hnu chuan a hrethiam ve ta deuh a. Mahse, a bul vel hi vah ah ala vau ta cheu mai a. Ka thin chu a ur ru tawh khawp mai. Ka la insum hram hram a. A ram leilung chhiatzia leh vat mahse engmah a thar dawn chuang lo a ni tih kan hrilh takah chuan dik a ti bawk si. A tihngaihna hre lo chuan a ramchhung area nia a ngiah chinah signboard tar a pawt thla lo turin min ti ta a. Chu erawh chu ka remtih sak a. Nui hak hak chung chuan kan inthen thei ta hram a ni.

      Heta ka sawi tum ber chu ‘Chhanna Nem in Thinur A Tikiang’ tih hi a tak in ka hmuh phah a. Thinrim takin lo chhang ve nghal ila chu keini pawh hi kan buai phah zawk ngei ang. Mahse, zaidam tak leh awka nem tak chunga  kan chhan hian midang kan hneh theihna awlsam ber a lo ni reng tih min hriat thar tir a. Kei ngei pawh hian zir tur ka ngah hle a ni tih ka hriatchhuah phah ta hlauh zawk a ni. 


Urlawk Zan

7:03:00 PM Noddy , Posted in , 3 Comments



Urlawk Zan (Christmas eve) chu kan thleng chu a ni ta reng mai. Masi putar pawh bazar in a buai ve ngawt in ka ring..lol.. Naupang tan chuan he hun hi a nghahhlelhawm thin reng a ni. Kan naupan lai (ti ve khanglang ila) chuan masi putar kha lo kal ve tak tak tura ngaihna kha ka lo nei hman pek a. Mahse, Ka dilchhut em avang khan thleng dawh a thlak tu chu ka nu leh pa ngei an ni tih ka hre ta. Zan mut dawnah khum lu bul chhuatah thleng chu kan dawh ve ran a.Mut lah a tui thei lo, engnge tla ang aw tihna rilru khan muthilh min tiharsa a.Ka nu in kan muhil tawh em tih min rawn endik pah a thleng a engngemaw an dah rak rak ri chuan khawvar min nghahhlelh tir zual sauh lehnghal.

Zing kara ka thleng dawh kan en meuh chuan awww!!! Nuam lutuk... Balloon cheng nga man chi arbawm tiat a tel tih kan hre mai tluka ka lawm kha a awm kher awm love. Thiante zinga han ham peng peng mai te kha nuam ve thin tak chu a ni.. lol Kan lo lian deuh a, mahni tawka tla hrang rual kan han ni a. Thlengdawh lam ai chuan nula ar kan pui tur lam in rilru a luah khat ta zawk a. Ar kan pui tur neih loh kha chu zahthlak lamah a kal lehnghal. 

Zan khat chu kan thian za ho khan Ar kg 2 aia rit mah tur hi thawhkhawmin kan han lei ve ngei a. Zan tir lamah nula ar kan pui tur zawng in kan han lengkual hmasa a. Sawm pawh kan han sawm ve nual a. Zan dar 11 velah pawh kan sawm te ho hmel reng chu a lang ta hauh lo mai a.Engtizia nge tia kan han zawh chuan kan sawm te ho kha an pa te'n chhuah an lo phal reng reng lo mai hi a lo ni a. A beidawn thlak ta ngei mai. Midang han sawm leh turin an lo in book lawk fir fer tawh mai si.Kan ar lei pawh chu talh peih reng kan awm ta lo. Zing lam khuan hmasa berah chuan kan arpa lei ngei mai kha a khuang ta el el mai a. Kan thianpa zak bawk si khan 'Ka rek hlum tho tho dawn che' tiin chhuatlaiah an han in umkual tak vel ah chuan nuihzat lamah a kal ta... Nui lo reng kan awm lo. Nula ar kan pui ai mahin chumi zan chuan kan hlim ta zawk mah mai a. Fiamthu thawh nan tak kan hmangzui ta bawk nen.. Urlawk zan kan hmanah chuan kan hlim ber a ni mai awm mange te kan   tih phah ta hial reng a.

Awle, Ar kan zan chu a lo thleng dawn chu a ni leh ta reng mai a. He hun lo thlen hian nunhlui min chhuikir tir thin a. Ka lung hi a leng thin khawp mai. Amaherawhchu, ti zawng hian ngaihtuahna hi ka hmang ta tlat thin a. He hun  kan hmandan hi kan inbih chiang ngai em? A hnu thla rei vak lova
kohhran phuar ngai khawpin he hun hi kan lo hmang palh ang tih a hlauhawm. Chuvangin Ar pawh kang ila, tiam chin bak pel lo turin fimkhur thiam a tha khawp mai. Chutilochu kan Ar kan atanga thla rei loteah mualphona in min umzui palh hlauh a nge.


Engpawhnise,  Krismas hlim taka inhman theih nan Lalpan hriselna thain vur mawlh che u rawh se.  

Steven, Khawnge I Awm ?

8:51:00 AM Noddy , Posted in , 1 Comment

Steven tia a hming kan phuah, kan duat ve ngawih ngawih in min boral san na chuan kum hnih a lo tling ve dawn ta der mai. A hun lai hi ka thlir kir lo thei thin lo. Kan fapa khatih laia kum 2 elh a chanve mi hian a ngaina leh zual a. Thian kawm tur dang nei ta lo chu an inkawm chawt reng hi a ni mai a.An in ngaina dun em em mai a. Khawiilo vah chhuah dawn pawn min ngen a, hlim tak maia ka hma a an kal vel thin te ka ngaihtuah hian kei tak pawh hian ka ngaina ve hle mai a. Kan chhungkua a kan pawmna pawh kum khat a tling mang lo tih chuan engnatna ber nge pawh kan hriat loh chuan tlak buak in Doctor thiam te rawn in damdawi chi hrang hrang nen a kan enkawl pawhin a nunna chu chhan theih a lo ni ta lo. Keini chhungkaw tan chuan vanpui a chim hi a ni ngawt mai a.

A thihdawn ni khan kei chuan Doctor thiam koh mai a ngai a ni tiin kan ina lo kal hram tur a ngen tumin ka thawk chhuak a. Ka zuk thlen chuan kan natna tawh dan leh kan mangan thu te, damdawi chi hrang hrang kan pek pawn engmah a an theih loh dan te, tunah tak phei chuan a chau hle a ni tih te leh ka rawn kal dawn khan chuan bawnghnute tlem chu a in ve peih a ni tih te chu ka thiam anga kimchang chuan ka zuk sawi ve a. An chhungkua hi an lo fel phian mai a. Min lo ngaihtuah em em mai a.

Ka natna sawi ang chi chu a lo hre fu mai a, enkawl ran chuan a dam leh mai thin a, amaherawhchu enkawl vat loh chuan a lo hlauhawm viau mai hi a lo ni a. Pakhat chu a tihdam tawh thu pawh min lo hrilh nghe nghe a. Mahse, kan natdan kan sawi chuan a duhai chuan kan lo tlai tawh a lo ni a. Chutia kan inbiak lai mek chuan ka mobile chu a lo ri a, kan en chuan kan nu a lo ni a. Nguai raih hian ‘ Lo haw leh mai rawh, tunah khan a chatthla chiah ’ a rawn ti ta mai a.Ka bing deuh mup in ka hria. Doctor hnenah pawh chuan chu chanchin chu zuai raih hian ka hrilh ta a. Ani pawh chuan pawi min tihpui ve hle mai a,‘Engatinge a tirah keimah min rawn loh le aw’ a ti ta vawng vawng mai a. A rilru tak takin pawi min tihpui ni nghe nghe in ka hria.

Tichuan phur lo tak leh hmanhmawh takin kan in lam pan chuan ka haw ta nghal a. Ka han thlen chuan Ka chhungte chuan a ruang chu an lo kil bial taih mai a. An mit kan en chuan mittui a lo tling piau mai a. Kan fapa phei chuan a tuar thiam lo lehzual a. A mittui chu dan rual loh hian a lo sur zung zung mai a.Ka lainat letling zawk khawp mai a. Chumi ni zan pawh chuan kan fapa zanlai lo harh chuan a ngaihthu rawn sawiin ‘Pa keini pawh hi kan thi ve thei em?’ tiin zawhna chhan hrehawm tak mai chu min rawn zawt hlawl mai a.

A tuk zingah pawh chuan a ruang kan zalhna hmuna kal a, lak chhuah leh chu a ngen ta tlat mai. A hmuh leh duhthu an sawi te chuan rilru a ti hrehawm lehzual a. Pa ber pawh ka lung hi a chhe ru ve em em mai a. Ka tih theih nise, khatihlai khan han tihdam leh hi he khawvela ka thil chak ber a ni hial ang. Ka fapa te tan khan Pa nih tling zo lo riau a inhriatna te ka neih phah rum rum mai a. Chutihlai chuan a ute ho pawh chuan a thlana phun tur thing phek hi an lo kilh khawm ve mek bawk a. Rawng hian nalh vak lo hian ti hian an lo ziak a.

“ Kan Ui Ngaih em em Stevena thlan”

Kan Thlai Ei Te An Him Tawk Em?

12:58:00 PM Noddy , Posted in , 1 Comment

Thiamna te a lo sang zel a, kan thil ei thenkhatte atanga natna lo awm theih dan leh chu chuan nun a tihtawi theih dante an hmuchhuak a, chung zingah chuan Synthetic Chemical Fertilizers leh Pesticides te hnuhma pawh a tel ve tih hriat chhuah a lo ni ta zel a.Hei vang hian tur hnuhma awm lo thei ang ber tura thlai thar chhuah tumna a lo awm ta a ni.

Tichuan, Mizoram sawrkar pawhin kan rama thil tharte an lo hlut zawk theih nan leh leilung hlutnate kan vawn nun reng theih nan “The Mizoram Organic Bill 2004” chu July 12th, 2004 khan a lo pass ta a ni.

Organic Farming?:-

Organic Farming chu leilunga hausakna inphum sa humhalh a, tangkai thei ang bera thlai chinna atana hman hi a ni a. He Farming System hian leilung awmdan pangngai mil zelin tui leh boruak leh lei chunglang thatna te hmang tangkai a, leilunga nunna nei awm reng rengte hriselna leh lei chunglang luangral turte a humhalh tlat a, mihring leh thilnung dang tana pawi thei Synthetic Chemical Fertilizer, Pesticides, Growth Regulators leh Livestock Feed Additives te aiah leitha dang - ran ek, thlai leh hnim tawih atang a siam leitha te, Bio-fertilizers leh Bio-pesticides te hmangin thlai a enkawl zawk a ni.Tin, leitha hnutchhiah chi thlai chinte a uar a, leia thilnung te chakna hman tangkai zual theih nan leh natna hrik inphum te an lo ven theih nan uluk taka lei lehphut te a huam vek a ni.

Kum 2004 kumkhan Organic Bill chu pass alo ni tawh a. Tunah hian a kaihhnawih Dept.lam pawn lei tha sem thleng in hma an la mek zel niin ka hria a, a lawmawm hle a ni.Engpawhnise,Mizorama kan thlai thar chhuah tam ber te hi thingtlang atanga lo kal niin, man man zawkin khar chhawngah te pek chhawn leh a ni a. Kei nin kan lo lei a, lungmuang takin kan ei ta a ni. Heta ka sawi duh tak chu Mizorama kan thlai thar neih hi chu a tlangpuiin heng Chemical Fertilizer sawrkar pawn hman a phal loh ho hi chu an hmang lo turah kan ngai ve ringawt a.

Mahse, ka ngaih ti thalo tu chu nikum lam tawh khan tute nge an nih pawh ka hriat lem loh te ti ti ka hriat dan in Serthlum hi natna hrik leh thil dang in a tihchhiat loh nan DDT a kah hi a tha khawp mai an ti a. Chuta tang chuan Serthlum ka ei pawh hi a tui loh phah sawt mai a. An vai chuan a ni e chu ka ti hauh lo mahse khatiang titi a awm chuan hmang hreh lo hi kan la awm em ni aw tiin ka inzawt ta mai mai a.

Tin, Sawhthing tam tur ven nan pawh hian DDT hi a tha khawp mai tihte kan hre leh zel a. Chubakah, khaw pakhata ka va zin zawk lai a ka hriat chu mipakhat hian an huan thei leh thlai awmna chu DDT ka theh thin a, a tha khawp mai tiin min lo hrilh bawk a.Kei lah chuan ava tha awm love tia kan zawh chuan tam vak lo te hi chu a pawi hlei nem tiin min chhang mai a. Khatiang khan a khat tawk a a tih thin thu min hrilh leh nghal a. Kha a huana thlai leh thei ho kha ei atan a him a ngem tih chu ka inzawhna lian tak a lo ni ta a ni.Mizoram chhung ngei ah pawh hetiang thil a awm chuan kan thlai thar te hi ei atan an him tawk a ngem?

Engpawhnise, Mizoram hi keimahni kan intodelh zo lova. Phai atangin thlai tam tak a rah chi tiam in kan la lut a. Chung zinga lar deuh chu Zikhlum, Parbawr, Tomato etc. te hi an ni. Him pial leh tha tak in rannung pawn an seh ve ngai loh ni awm tak a tha te kan lei theiin kan ei thei a. Heng te hi an him a ngem? Rannung hlo Pesticides te chu an hman hmel bawk si nen. An lo hmang ta lo hlauh a nih chuan kan vannei hle tihna a ni anga. Mahse, chutiang beiseina chu beiseina bo mai a ni. Hmanni a kan zikhlum lei chu chhum pawn DDT rim a nam vung vung thei tlat. Ei chi ah ngai lovin ka paih tir ta ringawt mai a.

Hetiang hi a nih avang in an hmang a ni ang e tih chu kan rinthu sawi ta mai mai a. DDT kher lo pawh rannung thahna hlo Pesticides te an lo hmang a nih pawn a hman dan tur mithiam ten an sawi hi zawm thei tal sela a tha tur a nia. Engpawhnisela, mithiamten rannung thahna hlo a thlai kah a nih chuan a seng hun leh ei theih hun hi bituk in ni 7-14 hma chu ei tur chuan seng loh hi a tha tiin inzirtir ve bawk mahsela kan chawhmeh ei tam phai atanga kan chawk luh te hi chutiang thlapa seng (harvest) a, thawnchhuah chu a ni kher a ngem?

A tawp ber ah chuan heng ka rawn sawi zawng zawng te avanga thlai kan ei tha ngam lo ngawt dawn a nih chuan a dik ber lo ang. Chuvangin, kan fimkhur tlan zawk theih nan a rawn sawi ka ni a. Kan lo hrisel tlan zawk theih nan tan kan lak theihna mual theuh ah tan ila thar leh ang u..

In My Dreams At Night

12:21:00 PM Noddy , Posted in , 0 Comments

Zan khat chu eng in nge min mawlh pawh ka hre lo, mumang lam ringawt mai ka buaipui a. Ka naupan tet lai atang a tun hun thleng hian mumang engzat nge ka neih tawh ang aw tih te ka ngaihtuah mai mai a. Ka lo ngah tawh viau mai tih te min ngaihtuah chhuah tir a.A ngai mumang a neih nawn lah a tam, a then lah sawi chhuah vek a tan pawh a zahthlak deuh roh mumang ni lawi si thil awihawm loh tak tak te nen a in pawlh sawp nuaih mai bawk a.A then lah inzawm lo em em in harh chuang si lo ten ka lo hmu nuaih mai bawk a.A then te lah mumang ni hlauh zawk se aw ti vawng vawng chung a han harh chhuah hlawl mai te...A chang a han thlawh diai diai mai te phei hi chuan nuam ve thei thin tak a ni.

Engpawh nise, mumang hi engnge maw a nih chiah hre tur in thiamna leh chhui zauna lam ah lah ka khawvel nun chhiar dan pawh a ka tlak chham ber pawl te zing a mi a lo ni bawk nen, mahse mak ang reng deuh mai chu mumang chu mumang a lo ni nge nge zel mai hi a ni.

Zanin zet chu khua a thiang nuam bawk a ka mumang hi ziak meuh in chhinchhiah ve chhin teh ang tiin mut hma in note bu nen ka inchhawp thlap mai a. Khawnge mut hma in tiin computer bulah thut hmun kan rem rem ta sauh sauh a. Mahse, ka thil tih lah chu ka tui tawh hek lo mumang chungchang ringawt mai chuan ka rilru zawng zawng chu a luah zo hi a ni ber mai. Chutia mumang chungchang ka ngaihtuah mek lai chuan hlim em em mai hian kan nu hian ‘Hnahthial ah chuan kan kal nghal mai dawn em ni ang’ a rawn ti a. Keipawh chuan engkhaw sawi set set lovin “A pawi chuang hlei nem” tiin kan chhang ta ngawt pek a. ‘Kan nu hi zawng a lo thu ber mai a nih hi’ ti chung zel in chhungkua chuan kan Car lei thar tha kan tih ve em em, tuma ta kan awh bik lohna ngei mai chuan zin chhuah tum in kan chhung buai zo ta. Mahse, kar lovah insiam zovin Hnahthial, tun hma pawh a sawrkhar hna chhete ka lo thawh tawhna hmun ngei pan chuan kan in khalh chhuak ve ta!!

Kan va thleng chu an in kan luahna te thin chhungkua, khatih lai pawh a chhungkhat ang mai lo in en thin te nen chuan kan va inhmu khawm ta!! Kan hlim dar dar ngei mai.Dam leh dam lohte in zawt in kan han in chibai nawk nawk a...Chutih lai tak mai chuan kan nu hian “Harh teh ...Harh teh , engtiziange i ban i va vai nasa vuat vuat ve, boxing i zir em ni?” tiin rawl ring deuh mai hian mi rawn sawi nawk nawk mai a.Kan harh hlawl mai chu Car chu sawi loh, kan inchhung chep ve tak mai ah chuan Computer dawhkan bawh in ka lo muthlu reng mai a lo ni a.

Buizova

11:57:00 AM Noddy , Posted in , 0 Comments



Ka zin chhuah na lamah Buizova zaina sunhlu kung thlalak na hun remchang neiin ka awm hlauh mai a.Kan Mizo rohlu te zinga pakhat hetiang a humhalh a lo ni hi a lawm awm hle mai. Sunhlu kung awm na hi E.Phaileng khaw dai, tlang chhip ah a ni a, kawngpui atang in 150m vel ah a awm a, a pan na kawng hi step leh boulder phah in tha taka siam a ni.A hmun hma a theng thaw nuam hle .a khaw hawina remchang tak a ni bawk a ni.Buizova lungleng taka an zai tur awm ang han mitthla pawn a awmlo chuang lo ve. Engpawhnise, Buizova kha zaithiam avang a lar a ni bawk a, a chanchin chu hre nel nual hlawm tawh mah ila chhiar peih te kan lo awm tak in a chanchin tlangpui kimchang vak lovin kan tarlang ve leh reng reng a nge.

Pi pute hun laia zaithiam ber a an sawi thin, Buizova hi chawngtui hnam a ni a. Chawngtuiho hi Mizo hnam peng hrang hrang zinga thlang tla hmasa pawl an ni a, an unau Chawngzo ho te nen thlang an tla rual a ni.A tet lai pawn a hmelchhiat em avangin a tual chaipui naupang ho chuan an chhaih nawmnah thin hle a, an kawm tha duh mang lova ni.Naupang chenbeh tak a nih bak ah pate kher khawr tak mai a la ni zui. Chubakah hmeithai fa a la ni leh zel a.A hmel chhiat em vang hian thian kawm tur pawh a nei ngai mang lova, thing delh loh lung delh loh ni ta fam chu a rawn tleirawl chhuak ve ta a. Tleirawl ti eng leh mar nalh pawh nei chuang hek lo, mite fiamthu thawhna leh kam chhe tleuhna ber a rawn ni chho zel ta tho va. Chung hunl;ai chuan a zaithiamzia chu an lo hre tan ta a, a zaithiamzia hi sawiin a siak lo va, a zai hian mi hip theihna mak danglam tak mai a nei a, a zai ri hre phak tawh phawt chuan ngaithla lovin an chhuah phal ngai lo, an thinlung chhungah hian thingthu ang maiin a muh hian a mut veng veng mai thin a ni.

Buizova a zai dawn chuan vawn tur tha tawk tak neih lawk hi a ngai ngei thin a, vawn tur nei lo va ngaihthlak mai mai chi a ni lo.A zai khan mi a hneh em em thin avangin thate hi a zawi zo vek a, an tlu ruai mai thin a ni an ti. Zaithiamin a zaiin mite hneh thei hle mah sela, a hmelchhiat em avang hian nulate chuan an lungten tlat zel a. Han ngaizawngin han duh ve deuh dawn hial thin mah se a hmel mawlh mai hian a tibam leh thin. A zai erawh tumah hian an ngaithla kham thei lo va, a hmel erawh tuman an hmu peih lo a ni ber mai.

Buizova zaithiamzia chu miten sawi huai huai thin mah sela, a nu chuan a awi duh tlat lo va, ‘Chuti takin Buia hi a zaithiam hlei lawng nge, miten an hmuhsit em avang hian tihnawmnah nan mai mai an sawi thin a ni ang,’ a ti tlat thin a. Vawi khat chu Buizova lawm rawih niin Buizova nu chu a feh ve a, lo an han thleng a, an bung dawn ta a. Buizova nu chuan, “E, Buia, miten i zaithiam thu hi an sawi an sawi a, i zai lah chu ka la hre ve ngai si lo va, tun tum chu i zaithiamzia ka hre ve duh tlat mai,” a ti ta a. Buizova lah chu a zai mai duh bik lo va, chutah le, a nu chuan, “I zai hma chu ka bung lovang,” a ti ta tlat a.

Buizova chu zai turin a inbuatsaih ta a, a lawmte ho chuan tih danglamin an awm leh dawn tih an hriat lawk avangin thingbul vawn tur remchang an hmuh ang angte chu an vuan ta ran hlawm a. Buizova nu chu thingbul rem chang vuan ve tur in an ti a, nimahsela a vuan ve duh chuang lo va. Chutah le, Buizova chu a rum tan ta der der a, zai tuma an hmm...hmm.. lai chuan an vau a thing tang ro chherawpah chuan thuro hi a rawn fu chat a, a rawn hram ta kar kar a, Buizova chuan thuro chu thlir chungin ruahtham loh hla a rawn chham chhuak a, a hla thluk pakhat nilen zai thlukin an sa ta mai a !!

“Ka vauva thuvate, i hram lai bang teh aw,
Kei pawh Lalngo ngaia ka tah ni tam e,”

a han ti ta mai a. Chutah le, a lawmte ho lah chu an tha a zawi zo va, thingbul vuanin an thuding zawi ngiai hlawm a, chakna reng nei lo ang mai hian Buizova zai lai chu an thlir a. Chutihlai chuan Buizova nu chu thingbul vuan a tanhmun te lo siam lawk ve hek lo, a tha han zawi thut kha inveng hman hek lo le, a lum ta a. Lo lah chu a awi ang reng si a, lo mawng thleng rawkin a lum ta a. A pawnfente lah chu a tla hrang rem rum a, Buizova chuan hmanhmawh takin a nu lum chu a umzui a, a pawnfente chu a chhar a, a nu bul a zu thlen chuan, “Ka nu, ka nu, eng nge i an , i na em ?” tih pahin a nu pawnfente chu a pe a. A nu chuan eng danga chhang lovin a pawnfen chu fen that mawlh mawlh pah hian Buizova banah chuan a vuan a, “Buia, kei ni angte chu min duh ve awm si lo va,” a lo ti a. Buizova chuan mak tih hmel takin a nu chu a en a, “Duh leh duh loh han sawi tur em ni kan nih le, i dam a, na i neih loh chuan tirawh, thlam lamah i chho vat teh ang khai, kan thiante ho pawh an lo hrilhhai rei lutuk ang e,” a ti a. Tichuan, Buizova nu chuan a fapa zaithiamzia chu a lo hre ve ta a.

Chawngtui atang chuan Buizova te chhungkua pawh mi tam zawk te hnung zuiin thlang an rawn tla ve ta zel a, Hmuifang tlang Chawngtui hmunah te, Reiekah te, E.Phailengah te a rawn awm thla zel a, hla te a phuah zel bawk a. A lo upat deuh hnu chuan a zai tlem ve tial tial a. A hun tawp lama a zai miten an sawi reh theih loh pakhat chu, E.Phaileng khaw bulah hian vawikhat chu Buizova lungleng hi sunhlu kungah a lawn a, duhthawh tak maiin a zai rum ta hlerh hlerh mai a, a zai chuan thlifim a ko va, thli a rawn thaw ta her her mai a, sunhlu hnah chu a rawn chhem til ta er er mai a ni.

Accident Thlentu Tlanchak

4:10:00 AM Noddy , Posted in , 0 Comments


Thil mak ve ang reng chu kum tawp krismas dawn hnaih lam hian Motor accident chi hrang hrang a thleng zing thin hle a, tunah pawh a thleng zing leh ta hle mai.Hei vang hian mitin in fimkhur kan mamawh leh zual a.Vanduaina kan tih tam tak hi chu a pumpelh ve theih a, chubakah fimkhur loh vang a lo thleng te pawh a ni ve thei tho bawk.Tin, kan chan tur reng a Pathian in min ruatsak te hi chu pumpelh rual a ni lova, Amaherawhchu, kan fimkhur chuan accident tam tak hi chu kan pumpelh thei tlat a ni.Hei kawng sir ah tiang hian Puspak lam pawn hriattirna an tar a. Hengte hi I zawm thar leh ang u. Engpawhnise, motor engchi pawh tlan chak hi chuan accident hi a lo awl deuh nge nge ni tur a ni.Chuvangin zawimuang a khalhin him taka kan thlenna tur hmun kan thlen theih nan kan zavaiin I fimkhur thar leh ang u.

Krismas Midangte Tan

6:29:00 AM Noddy , Posted in , 0 Comments


Kristian tan chuan hun pui ber lo thleng tur hi a nghahhlelh awm thin hle mai a.Nu leh Pa tam tak tan chuan a huphurh awm ang reng bawk si.Kumpui linglet a hna thawk in chuta thawhchhuah tlem te chu khawl ve keuh keuh in he hunpui lo thlen hian naupanglawm lei nan an hmang ral leh thin a.Chutiang neih loh hlau chuan hah pawh sawi thei lovin a sur a sa hnuaiah hna thawk in hun tam zawk an hmangral thin a ni. Engpawhnise, he hun lo thleng tur hi chhungkaw damtlang in kan hmang thei dawn em tih pawh hre lovin kum tir atangin kan er ber a ni nghal a. Damtlang taka chhhungkua a kum kan han hmangral leh mai thin te hi a hlu in Pathian kaihhruaina leh awmpuina vang liau liau a ni tih hi kan theihnghilh ang tih a hlauhawm a ni.

Hetiang tak maia kan nghahhlelh hian a hun hlutna a tizual in a ti nuam bik thin a.Amaherawhchu, awmlai vei leh chhungkaw kim a hmang thei ta lo a he hun chuangkai te tan erawh Krismas hun hi lungngaih tahna mai a ni thin si.Chuvangin a hlutna hrethiam a he hunah hian chhungkaw damtlang a hmang thei tan chuan Pathian hnena lawmthu sawi mawlh mawlh hi kan ba ni.

A tawp ber ah chuan Krismas hun lo thleng hi a hlim hlawp bawl zawng a thlir lovin midang tanpui nan te hmang zawk ta ila. Fa te kawrmawi ilo etc. leh krismas ruai thawhlawm tur takngial pawh neih lohna avang a miharsa zawk te tan lungngaihna hunah a chan mai loh nan theihtawp i chhuah zel ang u. Engpawhnise,Krismas kan hmuah thlen tum dan hi a tha zawng leh mite tana kawng engemaw tal a malsawmna ni thei turin mitin i inbuatsaih thar leh ang u.

Subscribe to: Posts (Atom)
Twitter Delicious Facebook Digg Stumbleupon Favorites More
powered by Blogger | WordPress by Newwpthemes | Converted by BloggerTheme