Steven, Khawnge I Awm ?

Steven tia a hming kan phuah, kan duat ve ngawih ngawih in min boral san na chuan kum hnih a lo tling ve dawn ta der mai. A hun lai hi ka thlir kir lo thei thin lo. Kan fapa khatih laia kum 2 elh a chanve mi hian a ngaina leh zual a. Thian kawm tur dang nei ta lo chu an inkawm chawt reng hi a ni mai a.An in ngaina dun em em mai a. Khawiilo vah chhuah dawn pawn min ngen a, hlim tak maia ka hma a an kal vel thin te ka ngaihtuah hian kei tak pawh hian ka ngaina ve hle mai a. Kan chhungkua a kan pawmna pawh kum khat a tling mang lo tih chuan engnatna ber nge pawh kan hriat loh chuan tlak buak in Doctor thiam te rawn in damdawi chi hrang hrang nen a kan enkawl pawhin a nunna chu chhan theih a lo ni ta lo. Keini chhungkaw tan chuan vanpui a chim hi a ni ngawt mai a.

A thihdawn ni khan kei chuan Doctor thiam koh mai a ngai a ni tiin kan ina lo kal hram tur a ngen tumin ka thawk chhuak a. Ka zuk thlen chuan kan natna tawh dan leh kan mangan thu te, damdawi chi hrang hrang kan pek pawn engmah a an theih loh dan te, tunah tak phei chuan a chau hle a ni tih te leh ka rawn kal dawn khan chuan bawnghnute tlem chu a in ve peih a ni tih te chu ka thiam anga kimchang chuan ka zuk sawi ve a. An chhungkua hi an lo fel phian mai a. Min lo ngaihtuah em em mai a.

Ka natna sawi ang chi chu a lo hre fu mai a, enkawl ran chuan a dam leh mai thin a, amaherawhchu enkawl vat loh chuan a lo hlauhawm viau mai hi a lo ni a. Pakhat chu a tihdam tawh thu pawh min lo hrilh nghe nghe a. Mahse, kan natdan kan sawi chuan a duhai chuan kan lo tlai tawh a lo ni a. Chutia kan inbiak lai mek chuan ka mobile chu a lo ri a, kan en chuan kan nu a lo ni a. Nguai raih hian ‘ Lo haw leh mai rawh, tunah khan a chatthla chiah ’ a rawn ti ta mai a.Ka bing deuh mup in ka hria. Doctor hnenah pawh chuan chu chanchin chu zuai raih hian ka hrilh ta a. Ani pawh chuan pawi min tihpui ve hle mai a,‘Engatinge a tirah keimah min rawn loh le aw’ a ti ta vawng vawng mai a. A rilru tak takin pawi min tihpui ni nghe nghe in ka hria.

Tichuan phur lo tak leh hmanhmawh takin kan in lam pan chuan ka haw ta nghal a. Ka han thlen chuan Ka chhungte chuan a ruang chu an lo kil bial taih mai a. An mit kan en chuan mittui a lo tling piau mai a. Kan fapa phei chuan a tuar thiam lo lehzual a. A mittui chu dan rual loh hian a lo sur zung zung mai a.Ka lainat letling zawk khawp mai a. Chumi ni zan pawh chuan kan fapa zanlai lo harh chuan a ngaihthu rawn sawiin ‘Pa keini pawh hi kan thi ve thei em?’ tiin zawhna chhan hrehawm tak mai chu min rawn zawt hlawl mai a.

A tuk zingah pawh chuan a ruang kan zalhna hmuna kal a, lak chhuah leh chu a ngen ta tlat mai. A hmuh leh duhthu an sawi te chuan rilru a ti hrehawm lehzual a. Pa ber pawh ka lung hi a chhe ru ve em em mai a. Ka tih theih nise, khatihlai khan han tihdam leh hi he khawvela ka thil chak ber a ni hial ang. Ka fapa te tan khan Pa nih tling zo lo riau a inhriatna te ka neih phah rum rum mai a. Chutihlai chuan a ute ho pawh chuan a thlana phun tur thing phek hi an lo kilh khawm ve mek bawk a. Rawng hian nalh vak lo hian ti hian an lo ziak a.

“ Kan Ui Ngaih em em Stevena thlan”

1 Response to "Steven, Khawnge I Awm ?"

  1. Dawldanga says:

    Ran te hi an lo ngainatawm ngawt mai. Keini chhung pawh hi Ui leh Zawhte ngaina chi kan nia, an han boral hian kan tuar nasa thei lutuk a, Ui hi chu kan vulh duh ta lo. A hnuah Zawhte vulh kan ching leh a; kan ngah lai berin a puitling ringawt pawh 6 kan nei, a note kan nei deuhreng bawk. Nghathu hi an chaw atan kan leisak a; kan in sengso nasa thei hle. 'Chaw tha taka kan pek chuan pawn lamah chaw zawngin an chhuak lovang' kan tih thin avangin insenso pawh chu kan huam a; Sazu takngial pawh an man thiam mang lo. Ka zawhte duat deuh bik phei hi chu a Nu zawnga an chhuah loh nan tiin Vety ho hnenah, 'a til min laksak ru' ka ti deuh reng thin a; an ngam chiah si lo. Khang hunlai khan kan la naupang deuh bawk nen an han boral hi chuan kan tap ziah chu a ni ber e. Kan kawmthlangah hian kan phum thlap zel. Kan inpuiah hian ka awm mumal lohna a rei ta deuh a; ka nu te hian an la vulh em ka hre lo, pakhat tal hi chu kan vulh deuh reng thin. Fin pawh an lo fing khawp ran hi. Ka zawhte pakhat, ka theihnghilh theih miah loh chu- zana ka leng tur te hi min zui tlat a, ka lenna hmun thlengin a lo kal a, a chang leh kan han in um haw leh rih thin. In lam pana ka haw te hi kawngah min lo chang a, thim chin leh chin lo atang hian min lo zuan chat a; min fiam zui a; inah hian kan in um lut zui ta thin. Ui fiam ang chiah hian a infiampui theih. Zanah ka bulah lo chuan a mu duh der lo bawk a, an han boral hi chuan rin aiin kan lo la na ve duh riau. A sei ta hle mai lolz

Post a Comment

powered by Blogger | WordPress by Newwpthemes | Converted by BloggerTheme