Urlawk Zan



Urlawk Zan (Christmas eve) chu kan thleng chu a ni ta reng mai. Masi putar pawh bazar in a buai ve ngawt in ka ring..lol.. Naupang tan chuan he hun hi a nghahhlelhawm thin reng a ni. Kan naupan lai (ti ve khanglang ila) chuan masi putar kha lo kal ve tak tak tura ngaihna kha ka lo nei hman pek a. Mahse, Ka dilchhut em avang khan thleng dawh a thlak tu chu ka nu leh pa ngei an ni tih ka hre ta. Zan mut dawnah khum lu bul chhuatah thleng chu kan dawh ve ran a.Mut lah a tui thei lo, engnge tla ang aw tihna rilru khan muthilh min tiharsa a.Ka nu in kan muhil tawh em tih min rawn endik pah a thleng a engngemaw an dah rak rak ri chuan khawvar min nghahhlelh tir zual sauh lehnghal.

Zing kara ka thleng dawh kan en meuh chuan awww!!! Nuam lutuk... Balloon cheng nga man chi arbawm tiat a tel tih kan hre mai tluka ka lawm kha a awm kher awm love. Thiante zinga han ham peng peng mai te kha nuam ve thin tak chu a ni.. lol Kan lo lian deuh a, mahni tawka tla hrang rual kan han ni a. Thlengdawh lam ai chuan nula ar kan pui tur lam in rilru a luah khat ta zawk a. Ar kan pui tur neih loh kha chu zahthlak lamah a kal lehnghal. 

Zan khat chu kan thian za ho khan Ar kg 2 aia rit mah tur hi thawhkhawmin kan han lei ve ngei a. Zan tir lamah nula ar kan pui tur zawng in kan han lengkual hmasa a. Sawm pawh kan han sawm ve nual a. Zan dar 11 velah pawh kan sawm te ho hmel reng chu a lang ta hauh lo mai a.Engtizia nge tia kan han zawh chuan kan sawm te ho kha an pa te'n chhuah an lo phal reng reng lo mai hi a lo ni a. A beidawn thlak ta ngei mai. Midang han sawm leh turin an lo in book lawk fir fer tawh mai si.Kan ar lei pawh chu talh peih reng kan awm ta lo. Zing lam khuan hmasa berah chuan kan arpa lei ngei mai kha a khuang ta el el mai a. Kan thianpa zak bawk si khan 'Ka rek hlum tho tho dawn che' tiin chhuatlaiah an han in umkual tak vel ah chuan nuihzat lamah a kal ta... Nui lo reng kan awm lo. Nula ar kan pui ai mahin chumi zan chuan kan hlim ta zawk mah mai a. Fiamthu thawh nan tak kan hmangzui ta bawk nen.. Urlawk zan kan hmanah chuan kan hlim ber a ni mai awm mange te kan   tih phah ta hial reng a.

Awle, Ar kan zan chu a lo thleng dawn chu a ni leh ta reng mai a. He hun lo thlen hian nunhlui min chhuikir tir thin a. Ka lung hi a leng thin khawp mai. Amaherawhchu, ti zawng hian ngaihtuahna hi ka hmang ta tlat thin a. He hun  kan hmandan hi kan inbih chiang ngai em? A hnu thla rei vak lova
kohhran phuar ngai khawpin he hun hi kan lo hmang palh ang tih a hlauhawm. Chuvangin Ar pawh kang ila, tiam chin bak pel lo turin fimkhur thiam a tha khawp mai. Chutilochu kan Ar kan atanga thla rei loteah mualphona in min umzui palh hlauh a nge.


Engpawhnise,  Krismas hlim taka inhman theih nan Lalpan hriselna thain vur mawlh che u rawh se.  

Kan chei mek e

Hei le, google keu chungin kan sawisa a nih ber hi, duhthu a la sam lo tih phat rual a ni lo. Theih anga thrui kual kawi a ngai roh va, a bu en chung chuan hmanhmawh a theih der bawk si loh, a siamtu lam thiam loh nen a nghah peih a ngai dawn a ni A neitu ber hi  network hmuh changin  a online thei hram a. Masi hmangin a thruihhruaite nen Darlawn lamah an awm vung tawh ang chu

Microsoft Office PowerPoint 2007 hmanga Template pakhata Presentation dahkhawm Dan.



A hmasa berah chuan P.presentation hi a tangkai khawp mai.Tunlaiah chuan training leh thildangah slide show kan hmang uar  chho ve ta a. Template ti mai ang page khat chauh a kan slide show present tur dah khawm a, mouse click zawnga a dang lo lang zel tur a siam hi ka thiam ang ang in kan sawifiah/zir in tum dawn teh ang.

Awle,template ti mai ang kha  pahnih tal i mamawh ang. Pakhat chu draft na zel tur a ni a nga. Pakhat chu i hman tur tak a. Tichuan,  I duh ang template i siam a, Background colour tur te i  thlan fel vek hnu ah a chungah khan Insert > Text box emaw wordart tih kha han select la,template awl laiah khan vawi 1 i klik a nga i duh chu i chhu tawh mai dawn nia , mahse text box pakhatah khan text pakhat chauh zel ( Vawi khat i click a lang tura i duh chauh) chhut tur. Font colour, style, type pawh duh a thlan theih a, box pawh i duh chuan i colour thei ang. I text thlan kha i duh ang tiata tihlen i duh chuan short cut zawng in Ctrl+Shift+> hei hi i hmang mai ang, tih tet duh pawn Ctrl+Shift+< hei hi i hmang bawk a nga, luh kual vel ai chuan a awlsam zawk a ni. A Point te te in aw:- 1.  Heading emaw i lecture tur point pawh nise Insert > Text box or wordart or header or footer i duh ber select rawh.
Pic 1   Click Pic. to enlarge

2.  Chuan i duh chu type la,a in select lai khan Format > selection pane select leh rawh.
Pic 2 Click pic. to enlarge

3.  Animation > Custom Animations select leh bawk rawh, chuan i sir dinglamah khan Custom Animation leh Selection visibility box a lo lang tawh ang.
Pic 3 Click pic. to enlarge
Pic 4 Click pic. to enlarge

4.  Point reng reng kha text box hranah i dah ho chu mouse i klik dan a zira danglam turin a siam theih ta vek a ni.Point 1 na chu han klik la, add effect atang khan siam tawh rawh le. I duh chuan transition pawh awm kha. A tam mai tihdanglam duh dan a zir in.

5.  Point khatna in template (phek) khat a luah khah tawh chuan Template chhunga klik leh huna reh tur a i duh zawng chu Shift hmet chung in i select vek anga.Custom  Animation-ah khan Exit a awm a nga,klik a a chhuah dan tur chu i duh ang in i select tawh mai dawn nia. Tin klik zawnga a lo luh dan tur pawh Entrance tiin awm  teuh bawk kha. Draft template na tur i siam atang khan phek hnihna tur chu i va draft a nga. phek khatna ah khan i paste lut leh dawn nia.Tichuan i duh ang in i siam  zel tawh mai dawn a ni.

6.  Custom Animations ah khan Start tih leh Speed tih pawh a awm kha. Startah khan On click tih i select anga. Speed tih ah kha chuan muangchang in nge lo lang  se i tih rang deuh in tih kha a ni mai.Tin, a hnuai berah khan Play leh Slide show tih pawh a awm kha. I thilsiam i enchhinna tur a nih kha.

Awle, hei zawng hi a ni a. I zir ve duh a nih chuan i computer hmaah thuthmun han rem sauh sauh la, A point pek ang indawt hian han ti ve dawn chin teh le. Tin, hriatthiam a har deuh a nih chuan engtik lai pawh in helai blog ah hian a zawh theih reng e. Ka lawm e.

Tawih Lova Hnah Hring Tihro (Vawnthat)

Hnah hring hi tawih lova tihroin rei tak a dahthat theih a. A tihdan chu Hnah hring kan lak kha a hul tur a ni a. Lehkhabu kar-ah dah tur a ni. Dah rual khan duh ang thlapa a hnah awmdan tur siam rem a, chumihnuah lahkhabu chu khup hnan tawh tur a ni. Tichuan hmun hnawng lovah dah a, Ni engngemaw zat,a ro awm hun velah uluk taka lak chhuah tur a ni.

Kan hnah tihro tawh chu Excercise Book-ah uluk taka rem tur a ni a. A tlak darh mai loh nan Cello tape in emaw a then lai laiah khan charh tur a ni. Lamination a ni ber mai ang chu chutiang deuh chuan hnah kan dahna phek te kha sarang pan (transparent) in tuam tur a ni a. Tichuan rei tak a dahthat theih tawh a ni. A hnuaia hnah ho hi kum 2003 a chutianga ka vawn that chu a ni a. Tun thleng hian ala danglam chuang lo in a mawina pawh hi a la chuai lo a ni.

1.

2.

3.

4.


5.

6.

7.

8.

9.

10.

11.

12.

13.

14.

15.

16.

17.

18.

Parts Per Million (ppm)

Damdawi emaw pawlhdal dan tur sawina chikhat a ni a. Thlai kahna chi rannung thahna leh thildang kan lei hian a hman dan tur hi ppm (Parts Per Million) in tar lan thin a ni tlangpui a. Hote anga lang hi hriat loh chuan a buaithlak ve duh hle khawp mai. Recommend a awm reng laia rin tawk tawk a tui nen a pawlh ngawt hi a tha ber lo a. Tin, pawlh tur a tih zat ang (recommend) hi a tlem deuh a nih pawn zawm mai hi a tha ber a ni. Hriat ve atan tiang hian sawifiah dawn ila a tha awm e.


Tui a let maktaduai khat nen pawlh tur tihna ang a ni.1ppm. a dal a pawlh tur chuan damdawi 1 mg. hi tui litre 1-a pawlh tur a ni. Hetiang in :-


1 ppm = 1 mg. leh tui 1 lit. pawlh tur.

10 ppm = 10 mg. leh tui 1 lit. pawlh tur.

100 ppm = 100 mg. leh tui 1 lit. pawlh tur.

mg = milligram

1000 mg. = 1 gm.

1000 gm. = 1 kg.

Tichuan, 10,00,000 mg. = 1 kg.

Tui 1 litre leh 1 kg. a intluk a ni.

HRIAT VE MAI MAI ATAN

Kg-1 zela thlai chi awm zat (approx.) :

1. Buh ------------------------- 48,000
2. Wheat --------------------- 30,000
3. Vaimim -------------------- 6,000
4. Faisa (jowar) ------------- 31,800
5. Moong Dal --------------- 32,000
6. Kelek Chana (Gram) --- 7,800
7. Behliang ------------------ 9,600
8. Badam -------------------- 5,600
9. La (Cotton) --------------- 16,000
10. Chhawhchhi ------------ 3,45,600
11. Tel antam chi ----------- 5,10,000
12. Hmarcha ---------------- 10,10,000
13. Purunsen ---------------- 2,30,000
14. Vaihlo -------------------- 95,50,000
15. Bean --------------------- 937



THEILAM (APPROX.)

Thei hming--------------Kg.1-a thei pum zat-----------Kung khata rah awmzat

1. Serthlum------------- pum 8--------------------------- 500 nos.
2. Hatkora-------------- pum 8--------------------------- 300 nos.
3. Nimbu --------------- pum 6--------------------------- 150 nos.
4. Sertawk-------------- pum 1--------------------------- 60 nos.
5. Zamir----------------- pum 3--------------------------- 100 nos.
6. Balhla----------------- pum 7-------------------------- Bu khat 10 kgs.
7. Tengtere-------------- pum 23------------------------- 2 quintal.
8. Thingfanghma------ pum 1--------------------------- 30 nos.
9. Theihai--------------- pum 5---------------------------500 nos.
10. Lakhuihthei-------- pum 1---------------------------1 nos.
11. Kawlthei------------- pum 10-15---------------------250 nos.


Source : SAWMFANG

Thlalak Thenkhat.

Rengan :-

Kawnpui khawdai lung.


Scooter hihi


Israel Serthlum Farmers ta kan zuk enpui ve ngeiah.


Golden Beach.


Vellore-I


Park. Vellore-II




Dialisys khawl (Artificial Kidney)


Thiante Inneihni... Rukru committee member-te... hihi

'Broken Pieces'

Broken Pieces

All across the nations,
Homes are fallen’.
And daily their number increases.
And the one who suffered most,
Aint the mothers, ain’t the fathers.
But children are the broken pieces.

# The children are the broken pieces,
When a home falls apart.
The children are the broken pieces.
(Oh tell me. )Whose gonna mend their tender hearts?

And when the nation is,
Filled with broken pieces,
Its so hard to build among the ruins.
You, Fathers and you, Mothers.
If you will not stay together,
Your children pay the price for what you’re doing.

(Repeat #)

God, come and mend the broken pieces.


He hla hi ka sa thiam.. Mahse tu phuah leh tu sak nge lam chu ka hre hauh lo. Engpawhnise, ka sawi tum tak chu he hla thu hian ka rilru a khawih tlat. Nu leh pa inthen avanga naupang in an lo tawrh theih zia min ngaihtuah chhuah tir!! Thihna avang hi chu kan sawi phak a ni lova. Mahse, engemaw vang mai a nupa inthen leh mai thin hi a tha lo ka ti. Broken family atanga naupang lo thang lian hi an khawngaihthlak bakah sualna tam tak pung zel pawh hi hetiang vang te pawh hi a ni mai thei? Chuvangin nu leh pa, fate neih tawh hnu a inthen leh mai hi engtinnge kan pumpelh theih ang? Nupa inthen chhanah hian nu in nge pa in mawhphur zawk? Tu thiam loh zawk nge ni ta ang? Engpawhnise, a pawimawh ta ber chu ‘A bul tan fuh hi a ngai a ni’ tih hi a ni.

A bul tan fuh tur chuan nulat tlangval lai atangin nupui pasal tur hi uluk taka thlan thiam a pawimawh awm e. Mi pakhat thusawi ka hriat reng thin chu, ‘Hmeichhia chu an hmel i en atang khan i control theih awm tur mi chu i hre thei mai ang. Chutiang lo chu nupui atan neih loh tur a ni’ a ti a. A dik hle in ka hria. Chuvang in kan control theih awm mi hi thlang thiam ila buaina tam tak kan pumpelh phawt tihna a nih hmel hle mai.

A tawp ber ah chuan, kum khat em pawh inngaizawng lovin leh mizia inhriatchian sak tawn mang lovin kan han innei a. A nghawng leh chu awlsam taka inthen hi a ni. Tin, inthen hrim hrim pawh hi kan awlsam mah mah thin. Pathian leh a kohhran hmaah, ‘A hrehawmah pawh a nuam ah pawh damchhung in’ tia intiam khan kan han innei a. Kum hnih khat lekah kan han inthen leh ringawt a. Karah fate an lo tla hman tawh thin si.Fate hmalam hun dawn pui miah lovin nu leh pa lah chuan enge a nih bik ti ni awm fahran in kan tuang kan tichhah a. Ngam sarh maiin kan han inthen a. A pawi thin hle mai. Chuvangin, broken family nei tlem tur in thalai te, nupui pasal la nei turte hian tan ila thar ang u. “God, Come And Mend The Broken Pieces”

Steven, Khawnge I Awm ?

Steven tia a hming kan phuah, kan duat ve ngawih ngawih in min boral san na chuan kum hnih a lo tling ve dawn ta der mai. A hun lai hi ka thlir kir lo thei thin lo. Kan fapa khatih laia kum 2 elh a chanve mi hian a ngaina leh zual a. Thian kawm tur dang nei ta lo chu an inkawm chawt reng hi a ni mai a.An in ngaina dun em em mai a. Khawiilo vah chhuah dawn pawn min ngen a, hlim tak maia ka hma a an kal vel thin te ka ngaihtuah hian kei tak pawh hian ka ngaina ve hle mai a. Kan chhungkua a kan pawmna pawh kum khat a tling mang lo tih chuan engnatna ber nge pawh kan hriat loh chuan tlak buak in Doctor thiam te rawn in damdawi chi hrang hrang nen a kan enkawl pawhin a nunna chu chhan theih a lo ni ta lo. Keini chhungkaw tan chuan vanpui a chim hi a ni ngawt mai a.

A thihdawn ni khan kei chuan Doctor thiam koh mai a ngai a ni tiin kan ina lo kal hram tur a ngen tumin ka thawk chhuak a. Ka zuk thlen chuan kan natna tawh dan leh kan mangan thu te, damdawi chi hrang hrang kan pek pawn engmah a an theih loh dan te, tunah tak phei chuan a chau hle a ni tih te leh ka rawn kal dawn khan chuan bawnghnute tlem chu a in ve peih a ni tih te chu ka thiam anga kimchang chuan ka zuk sawi ve a. An chhungkua hi an lo fel phian mai a. Min lo ngaihtuah em em mai a.

Ka natna sawi ang chi chu a lo hre fu mai a, enkawl ran chuan a dam leh mai thin a, amaherawhchu enkawl vat loh chuan a lo hlauhawm viau mai hi a lo ni a. Pakhat chu a tihdam tawh thu pawh min lo hrilh nghe nghe a. Mahse, kan natdan kan sawi chuan a duhai chuan kan lo tlai tawh a lo ni a. Chutia kan inbiak lai mek chuan ka mobile chu a lo ri a, kan en chuan kan nu a lo ni a. Nguai raih hian ‘ Lo haw leh mai rawh, tunah khan a chatthla chiah ’ a rawn ti ta mai a.Ka bing deuh mup in ka hria. Doctor hnenah pawh chuan chu chanchin chu zuai raih hian ka hrilh ta a. Ani pawh chuan pawi min tihpui ve hle mai a,‘Engatinge a tirah keimah min rawn loh le aw’ a ti ta vawng vawng mai a. A rilru tak takin pawi min tihpui ni nghe nghe in ka hria.

Tichuan phur lo tak leh hmanhmawh takin kan in lam pan chuan ka haw ta nghal a. Ka han thlen chuan Ka chhungte chuan a ruang chu an lo kil bial taih mai a. An mit kan en chuan mittui a lo tling piau mai a. Kan fapa phei chuan a tuar thiam lo lehzual a. A mittui chu dan rual loh hian a lo sur zung zung mai a.Ka lainat letling zawk khawp mai a. Chumi ni zan pawh chuan kan fapa zanlai lo harh chuan a ngaihthu rawn sawiin ‘Pa keini pawh hi kan thi ve thei em?’ tiin zawhna chhan hrehawm tak mai chu min rawn zawt hlawl mai a.

A tuk zingah pawh chuan a ruang kan zalhna hmuna kal a, lak chhuah leh chu a ngen ta tlat mai. A hmuh leh duhthu an sawi te chuan rilru a ti hrehawm lehzual a. Pa ber pawh ka lung hi a chhe ru ve em em mai a. Ka tih theih nise, khatihlai khan han tihdam leh hi he khawvela ka thil chak ber a ni hial ang. Ka fapa te tan khan Pa nih tling zo lo riau a inhriatna te ka neih phah rum rum mai a. Chutihlai chuan a ute ho pawh chuan a thlana phun tur thing phek hi an lo kilh khawm ve mek bawk a. Rawng hian nalh vak lo hian ti hian an lo ziak a.

“ Kan Ui Ngaih em em Stevena thlan”

Kan Thlai Ei Te An Him Tawk Em?

Thiamna te a lo sang zel a, kan thil ei thenkhatte atanga natna lo awm theih dan leh chu chuan nun a tihtawi theih dante an hmuchhuak a, chung zingah chuan Synthetic Chemical Fertilizers leh Pesticides te hnuhma pawh a tel ve tih hriat chhuah a lo ni ta zel a.Hei vang hian tur hnuhma awm lo thei ang ber tura thlai thar chhuah tumna a lo awm ta a ni.

Tichuan, Mizoram sawrkar pawhin kan rama thil tharte an lo hlut zawk theih nan leh leilung hlutnate kan vawn nun reng theih nan “The Mizoram Organic Bill 2004” chu July 12th, 2004 khan a lo pass ta a ni.

Organic Farming?:-

Organic Farming chu leilunga hausakna inphum sa humhalh a, tangkai thei ang bera thlai chinna atana hman hi a ni a. He Farming System hian leilung awmdan pangngai mil zelin tui leh boruak leh lei chunglang thatna te hmang tangkai a, leilunga nunna nei awm reng rengte hriselna leh lei chunglang luangral turte a humhalh tlat a, mihring leh thilnung dang tana pawi thei Synthetic Chemical Fertilizer, Pesticides, Growth Regulators leh Livestock Feed Additives te aiah leitha dang - ran ek, thlai leh hnim tawih atang a siam leitha te, Bio-fertilizers leh Bio-pesticides te hmangin thlai a enkawl zawk a ni.Tin, leitha hnutchhiah chi thlai chinte a uar a, leia thilnung te chakna hman tangkai zual theih nan leh natna hrik inphum te an lo ven theih nan uluk taka lei lehphut te a huam vek a ni.

Kum 2004 kumkhan Organic Bill chu pass alo ni tawh a. Tunah hian a kaihhnawih Dept.lam pawn lei tha sem thleng in hma an la mek zel niin ka hria a, a lawmawm hle a ni.Engpawhnise,Mizorama kan thlai thar chhuah tam ber te hi thingtlang atanga lo kal niin, man man zawkin khar chhawngah te pek chhawn leh a ni a. Kei nin kan lo lei a, lungmuang takin kan ei ta a ni. Heta ka sawi duh tak chu Mizorama kan thlai thar neih hi chu a tlangpuiin heng Chemical Fertilizer sawrkar pawn hman a phal loh ho hi chu an hmang lo turah kan ngai ve ringawt a.

Mahse, ka ngaih ti thalo tu chu nikum lam tawh khan tute nge an nih pawh ka hriat lem loh te ti ti ka hriat dan in Serthlum hi natna hrik leh thil dang in a tihchhiat loh nan DDT a kah hi a tha khawp mai an ti a. Chuta tang chuan Serthlum ka ei pawh hi a tui loh phah sawt mai a. An vai chuan a ni e chu ka ti hauh lo mahse khatiang titi a awm chuan hmang hreh lo hi kan la awm em ni aw tiin ka inzawt ta mai mai a.

Tin, Sawhthing tam tur ven nan pawh hian DDT hi a tha khawp mai tihte kan hre leh zel a. Chubakah, khaw pakhata ka va zin zawk lai a ka hriat chu mipakhat hian an huan thei leh thlai awmna chu DDT ka theh thin a, a tha khawp mai tiin min lo hrilh bawk a.Kei lah chuan ava tha awm love tia kan zawh chuan tam vak lo te hi chu a pawi hlei nem tiin min chhang mai a. Khatiang khan a khat tawk a a tih thin thu min hrilh leh nghal a. Kha a huana thlai leh thei ho kha ei atan a him a ngem tih chu ka inzawhna lian tak a lo ni ta a ni.Mizoram chhung ngei ah pawh hetiang thil a awm chuan kan thlai thar te hi ei atan an him tawk a ngem?

Engpawhnise, Mizoram hi keimahni kan intodelh zo lova. Phai atangin thlai tam tak a rah chi tiam in kan la lut a. Chung zinga lar deuh chu Zikhlum, Parbawr, Tomato etc. te hi an ni. Him pial leh tha tak in rannung pawn an seh ve ngai loh ni awm tak a tha te kan lei theiin kan ei thei a. Heng te hi an him a ngem? Rannung hlo Pesticides te chu an hman hmel bawk si nen. An lo hmang ta lo hlauh a nih chuan kan vannei hle tihna a ni anga. Mahse, chutiang beiseina chu beiseina bo mai a ni. Hmanni a kan zikhlum lei chu chhum pawn DDT rim a nam vung vung thei tlat. Ei chi ah ngai lovin ka paih tir ta ringawt mai a.

Hetiang hi a nih avang in an hmang a ni ang e tih chu kan rinthu sawi ta mai mai a. DDT kher lo pawh rannung thahna hlo Pesticides te an lo hmang a nih pawn a hman dan tur mithiam ten an sawi hi zawm thei tal sela a tha tur a nia. Engpawhnisela, mithiamten rannung thahna hlo a thlai kah a nih chuan a seng hun leh ei theih hun hi bituk in ni 7-14 hma chu ei tur chuan seng loh hi a tha tiin inzirtir ve bawk mahsela kan chawhmeh ei tam phai atanga kan chawk luh te hi chutiang thlapa seng (harvest) a, thawnchhuah chu a ni kher a ngem?

A tawp ber ah chuan heng ka rawn sawi zawng zawng te avanga thlai kan ei tha ngam lo ngawt dawn a nih chuan a dik ber lo ang. Chuvangin, kan fimkhur tlan zawk theih nan a rawn sawi ka ni a. Kan lo hrisel tlan zawk theih nan tan kan lak theihna mual theuh ah tan ila thar leh ang u..

Khuavang Chhinchhiah

1. Kiu atnga banrek inkar a mi - An hlim thei a, Lehkha chhiar an ngaina.

2. Ban bul - Hawihhawm tak leh tuarchhel tak an ni duh. An taima duh hle bawk.

3. Koki veilam - Mi hauhmang; mi kawlhsen tak an ni duh.

4. Koki dinglam - Mi rinawm, mi ti kher kher an ni.

5. Kawngbawr a awm - Mi lawm thei/ Hlim thei tak mi an ni.

6. Malpui ding lam - Mi thu hnial lo leh mi tha tak an ni.

7. Malpui vei lam - Mi zaidam leh taima tak an ni duh.

8. Khup vei lam - Tuan rang tak engmah ngaihtuah lo mi an ni. Incheina lam uar leh pawisa khawhral ching an ni.

9. Khup ding lam - Mi ngilnei/mi zahawm an ni.

10. Ke rek - Mi ngui, chak lo an ni.

11 Kephah - Mi lungleng thei tak, lehkha chhiar leh mahnia awm ngaina mi an ni.

12. Chal ko - Mi thiltithei tak an ni. Mit ko dinglama awm pawh chutiang tho an ni.

13. Chal sir pawn vei lam - Mi thatchhia leh mi chimawm mi an ni.

14. Mit sir pawn lama awm - Mi zahawm leh ngilnei ngawichawi tak an ni.

15. Biang - Mi hmangaih thei tak an ni.

16. Hmui chung leh hnuaia awm - Mi chekngel leh ngal chak an ni.Mi ti kher kher an ni

17. Hnar a awm - Mi tuanrang ninhlei tak an ni.

18. Hrawka awm - Thian atan an taima,an ngawichawia inchei an uar.Duhthusam an ching.

19. Awm ding lam - Mi taima, rilru mumal nei mang lo an ni.

20. Awm lai tak a mi - Mi hau hmang,mi thiltih sual hmu thei tak,hlawhtling thei lo mi an ni.

21. Awm vei lam tawp, thin hnuai zawn a mi - Mi rilru mumal nei lo leh fimkhurna nei lo mi an ni.

22. Nak ding lam - Mi that chhia leh dawt thu zep thei tak an ni.

23. Khuavang chhinchhiaha hmul chawr - Chu mi vannei leh mi rawn tlak leh mi zahawm leh eihmu an ni duh.

Martar Stephana

Tirh. 7:55-60.
Nimahsela ani chu Thlarau Thianghlima khat a ni a, van lam a en tlat a,
Pathian ropuizia leh Pathian ding lama Isua ding a hmu a; “Ngai teh u, van inhawngte ka hmu a, Pathian ding lama Mihring Fapa ding pawh ka hmu,” a ti a.

Chutichuan anni chu aw ring takin an au va, an beng an hup a, rual takin an bei chiam a, khua ata chu an hnawt chhuak a, lungin an deng a, a hretute chuan tlangval pakhat a hming Saula ke bulah chuan an puante an dah hlawm a.

Chutichuan Stephanan “Lal Isu, ka thlarau la ang che,” tia Lalpa a koh laiin lungin an deng ruih ruih a.Tin, a thingthi a, aw ring takin a au va, “Lalpa, hei an thil tihsual hi an chungah mawh phurhtir suh ang che,” a ti a. Tin, chu thu chu a sawi zawh veleh a muhil ta a.

Stephana lunga an denhlum thu hi chang lar tak a ni a. Stephana hian amah tiduhdah tute lam en lovin Van lam chauh a thlir a. Van inhawng leh Pathian dinglama Isua ding a hmuh thu a sawi a ni.

Kohhrana kan rawngbawlpuite/ Kohhran Upa/ hruaitute kan thlir chuan mihring ve bawk tlin lohna nei ve tho an nih avangin an nunah hian lungawina kim hi kan hmu thin lova. Hei hian kan thlarau nun ram tichauvin, Isua rawng bawl kan nih kan intheihnghilh thin.

Tin, midang tlin lohnate sawiin, kan in sawi sel tawn a. Kan phak ang tawk theuh a rawng kan bawlna kawngah hian kan intina tawn thin. Stephana ngei pawh kha deu sawhin, thi khawp hialin sawisa mahse a bul vel a thil awmin a tibuai ve lova, Pathian ding lama Isua ding chauh kha a hmu a ni.Chuvangin, vawiin, chawlhni thianghlimah hian van lam thlir in, midang tlin lohna te chu dahtha in hun i hmang theuh ang u.

Get Crazy !!

(1) More than 50% of the people in the world have never made or received a telephone call.

(2) An average human loses about 200 head hairs per day.

(3) Only human beings sleep on their backs.

(4) In Alaska, it is legal to shoot bears. However, waking a sleeping bear for the purpose of taking a photograph is probihited!

(5) Table cloth were originally meant to be used as towels with which dinner guests could wipe their hands and faces after eating.

(6) The global average efficiency of vehicles is 5km to a litre, Japan and Western Europe manage an average of upto 11km.

(7) Do you have pnigophobia? It’s the fear of choking on fish bones!

(8) How about Caligynephobia? It is the fear of beautiful woman!!

(9) The original English language alphabet had only 24 letters. J and U joined the alphabet much later!

(10) The world’s first gymnasiums were introduced in 900 B.C in Greece and athletes practised in the nude to the accompaniment of music.

(11) Siper glue was invented by accident. The researcher was trying to make optical coating materials, and would test their properties by putting them between two prisms and shining light through them. When he tried the Cyano-Acrylite, he couldn’t get the prism apart.

(12) The most venomous of all snakes is the Inland Taipan, which has enough venom in one bite to kill more than 200,000 mice.

In My Dreams At Night

Zan khat chu eng in nge min mawlh pawh ka hre lo, mumang lam ringawt mai ka buaipui a. Ka naupan tet lai atang a tun hun thleng hian mumang engzat nge ka neih tawh ang aw tih te ka ngaihtuah mai mai a. Ka lo ngah tawh viau mai tih te min ngaihtuah chhuah tir a.A ngai mumang a neih nawn lah a tam, a then lah sawi chhuah vek a tan pawh a zahthlak deuh roh mumang ni lawi si thil awihawm loh tak tak te nen a in pawlh sawp nuaih mai bawk a.A then lah inzawm lo em em in harh chuang si lo ten ka lo hmu nuaih mai bawk a.A then te lah mumang ni hlauh zawk se aw ti vawng vawng chung a han harh chhuah hlawl mai te...A chang a han thlawh diai diai mai te phei hi chuan nuam ve thei thin tak a ni.

Engpawh nise, mumang hi engnge maw a nih chiah hre tur in thiamna leh chhui zauna lam ah lah ka khawvel nun chhiar dan pawh a ka tlak chham ber pawl te zing a mi a lo ni bawk nen, mahse mak ang reng deuh mai chu mumang chu mumang a lo ni nge nge zel mai hi a ni.

Zanin zet chu khua a thiang nuam bawk a ka mumang hi ziak meuh in chhinchhiah ve chhin teh ang tiin mut hma in note bu nen ka inchhawp thlap mai a. Khawnge mut hma in tiin computer bulah thut hmun kan rem rem ta sauh sauh a. Mahse, ka thil tih lah chu ka tui tawh hek lo mumang chungchang ringawt mai chuan ka rilru zawng zawng chu a luah zo hi a ni ber mai. Chutia mumang chungchang ka ngaihtuah mek lai chuan hlim em em mai hian kan nu hian ‘Hnahthial ah chuan kan kal nghal mai dawn em ni ang’ a rawn ti a. Keipawh chuan engkhaw sawi set set lovin “A pawi chuang hlei nem” tiin kan chhang ta ngawt pek a. ‘Kan nu hi zawng a lo thu ber mai a nih hi’ ti chung zel in chhungkua chuan kan Car lei thar tha kan tih ve em em, tuma ta kan awh bik lohna ngei mai chuan zin chhuah tum in kan chhung buai zo ta. Mahse, kar lovah insiam zovin Hnahthial, tun hma pawh a sawrkhar hna chhete ka lo thawh tawhna hmun ngei pan chuan kan in khalh chhuak ve ta!!

Kan va thleng chu an in kan luahna te thin chhungkua, khatih lai pawh a chhungkhat ang mai lo in en thin te nen chuan kan va inhmu khawm ta!! Kan hlim dar dar ngei mai.Dam leh dam lohte in zawt in kan han in chibai nawk nawk a...Chutih lai tak mai chuan kan nu hian “Harh teh ...Harh teh , engtiziange i ban i va vai nasa vuat vuat ve, boxing i zir em ni?” tiin rawl ring deuh mai hian mi rawn sawi nawk nawk mai a.Kan harh hlawl mai chu Car chu sawi loh, kan inchhung chep ve tak mai ah chuan Computer dawhkan bawh in ka lo muthlu reng mai a lo ni a.

Chhandamna Thu

Luka 23:39

Tin, an mi sual khai pakhat chuan Isua a hau va, “Krista chu i ni lo vem ni? Intidam la, keini pawh min tidam ta che,” a ti a.Nimahsela pakhat chuan chhan pahin a zilhhau va, “Pathian meuh pawh i hlau na nge? Thuhmun rengin an hrem che hi.Keini zawng hremzia reng kan ni; kan thiltih man chauh hmu kan nih hi; he mi hi zawngin engmah a tisual si lo,” a ti a.Tin, “Isu, i ram i thlen hunah mi hre reng ang che,” a ti a.Tin, ani chuan a hnenah, “Tih tak meuhvin ka hrilh a che, vawiinah hian ka hnenah Paradis-ah i awm ve ang,” a ti a.

Helai chang ah hian misual pahnih Isua ruala Kraws a an khaikan kha kan hmu a. Pakhat zawk chuan Isua hi intidam a, anni pawh tidam ve turin a duh a ni.Mahse, pakhat zawk erawh chuan Misual a nih a inhre chiang a, hrem tlak an nih thu kha a bula mi chu a va hrilh ta zawk a.Tah tak hian Misual pakhat zawk khan sual nih inhria in hrem an phu zia kha a rawn sawi chhuak a. Mahse Isua hi a ring em tih a la lang chuang lo. Amaherawhchu, “Isu, i ram i thlen hunah mi hre reng ang che,” a ti a. Hei tak hi a ni Isua a rinna chu ni. Isua chuan “Tih tak meuhvin ka hrilh a che, vawiinah hian ka hnenah Paradis-ah i awm ve ang,” a ti ta a ni.

Tah hian a pawimawh dan in ang chu Sual nih inhriat, sima, a hnena kal/amah ringtu chu Isua khan Vanram kai ngei turin a ti ta a ni.Sual nih inhriat ringawt kha a tawk zo lo a ni. Amah rinna kha a pawimawh tel ta a ni. Misual pakhat zawk an khaikan pawh hian Isua kha Lal a nih a pawm thlap a. A Lal na ram a thlen hun khan hrereng tur in a duh a ni.Chuvang chuan Sual sim leh rinna kha a pawimawh ta hle a ni.Isua ruala misual pahnih an khaikan chungchang ah hian pakhat zawk hi a sual simna lam ringawt hi kan hria a, a rinna lam hi kan hmuh hmaih thin. Johana 3:3

Tin, Isuan a chhang a, a hnenah, “Tih tak meuhvin, tih tak meuhvin ka hrilh a che,mi tupawh an pian thar loh chuan Pathian ram an hmu thei lo vang,” a ti a.Nikodeman a hnenah, “Mi, a tar hnuin engtin nge a pian theih ang? A nu pumah vawi hnih lutin a piang thei em ni?” a ti a.Isuan a chhang a, “Tih tak meuhvin, tih tak meuhvin ka hrilh a che, mi tupawh tuiah leh thlarauva an pian loh chuan Pathian ramah an lut thei lo vang.

Hmangchang

Hei le hmangchang kan tangkaipui theih deuh tur ka rawn zawng khawm e. Thenkhat tana a lo tangkai tak hlauh in ka rawn chhawp chhuak ve tawp e...

(1) Cotton var hi Soda nen a, tui soa chhum hian a tivar zual.

(2) Puan i suk a, ruah a sur si a phona rem chang a awm loh chuan, chhuatah lehkha phah la, chumi chungah chuan thawmhnaw huh chu pharh la. Fan chhemtir mai rawh.

(3) Thawmhnawa thisen kai chu, chi tuiah engemaw chen chiah a sukfai theih a ni.

(4) Aieng leh mawm thawmhnawa kai hi Toothpaste hnawih la, suk hmain darkar hnih vel chiah rawh.

(5) Thir tuiek thawmhnaw a kai chu ser tui emaw, dawi hnawih a, nisaah rei tak phoin tui sain a sukfai theih.

(6) Puan i nawhin, i tih huhna tur tui kha tui vawt aiin tui lum hmang zawk ang che.

(7) Thing furniture a mawm a kai chuan spirit in a hruk fai theih.

(8) Thing furniture ah rawng a kai palh chuan Vinegar leh tuilum a nawh fai theih a ni. Pentui kai chu chi leh sertui-in hru ang che.

(9) Glazed tile bal tihfai i duh chuan, ser tuiin zut chhuak vek la, minute 15 vel hnuah puannem in i hrufai dawn nia.


(10) Thirbelah chawhmeh i kan dawnin, tel telh hmain minute khat vel chhuang sa ang che, chawhmeh bet tur a veng ang.

(11) Alu i vel hmain tui lumah chiah hmasa la, vel a awlsam phah ang. Alu chips i siam dawnin, i kanna tur telah soda tlem thlak la, alu chips chu a tiram ang.

(12) Thlai hnah sil naah Vinegar tlem far la, rannung awlsam takin an tla mai ang.

(13) Buhfai tuilo chu-tel(oil) tel lovin kang hmui hret ila, tui a rei vak lo chiah leh hnu ah chhum hian a tui phah deuh thei.

(14) Sa i siam reng rengin a hmin hma chuan chi al lo la, chi telh hma hian a ti sak duh. Sa i kang ro emaw roast a nih pawhin, chi telh mai suh, chi telh hma hian a sa hanna a sawr chhuak duh thin.

(15) Bawnghnute a chhiat i hlauh chuan, i chhuanso hmain chini tlem telh ang che. Bawnghnute belah stainless steel no dah la, a so liam lo mai ang.

Buizova



Ka zin chhuah na lamah Buizova zaina sunhlu kung thlalak na hun remchang neiin ka awm hlauh mai a.Kan Mizo rohlu te zinga pakhat hetiang a humhalh a lo ni hi a lawm awm hle mai. Sunhlu kung awm na hi E.Phaileng khaw dai, tlang chhip ah a ni a, kawngpui atang in 150m vel ah a awm a, a pan na kawng hi step leh boulder phah in tha taka siam a ni.A hmun hma a theng thaw nuam hle .a khaw hawina remchang tak a ni bawk a ni.Buizova lungleng taka an zai tur awm ang han mitthla pawn a awmlo chuang lo ve. Engpawhnise, Buizova kha zaithiam avang a lar a ni bawk a, a chanchin chu hre nel nual hlawm tawh mah ila chhiar peih te kan lo awm tak in a chanchin tlangpui kimchang vak lovin kan tarlang ve leh reng reng a nge.

Pi pute hun laia zaithiam ber a an sawi thin, Buizova hi chawngtui hnam a ni a. Chawngtuiho hi Mizo hnam peng hrang hrang zinga thlang tla hmasa pawl an ni a, an unau Chawngzo ho te nen thlang an tla rual a ni.A tet lai pawn a hmelchhiat em avangin a tual chaipui naupang ho chuan an chhaih nawmnah thin hle a, an kawm tha duh mang lova ni.Naupang chenbeh tak a nih bak ah pate kher khawr tak mai a la ni zui. Chubakah hmeithai fa a la ni leh zel a.A hmel chhiat em vang hian thian kawm tur pawh a nei ngai mang lova, thing delh loh lung delh loh ni ta fam chu a rawn tleirawl chhuak ve ta a. Tleirawl ti eng leh mar nalh pawh nei chuang hek lo, mite fiamthu thawhna leh kam chhe tleuhna ber a rawn ni chho zel ta tho va. Chung hunl;ai chuan a zaithiamzia chu an lo hre tan ta a, a zaithiamzia hi sawiin a siak lo va, a zai hian mi hip theihna mak danglam tak mai a nei a, a zai ri hre phak tawh phawt chuan ngaithla lovin an chhuah phal ngai lo, an thinlung chhungah hian thingthu ang maiin a muh hian a mut veng veng mai thin a ni.

Buizova a zai dawn chuan vawn tur tha tawk tak neih lawk hi a ngai ngei thin a, vawn tur nei lo va ngaihthlak mai mai chi a ni lo.A zai khan mi a hneh em em thin avangin thate hi a zawi zo vek a, an tlu ruai mai thin a ni an ti. Zaithiamin a zaiin mite hneh thei hle mah sela, a hmelchhiat em avang hian nulate chuan an lungten tlat zel a. Han ngaizawngin han duh ve deuh dawn hial thin mah se a hmel mawlh mai hian a tibam leh thin. A zai erawh tumah hian an ngaithla kham thei lo va, a hmel erawh tuman an hmu peih lo a ni ber mai.

Buizova zaithiamzia chu miten sawi huai huai thin mah sela, a nu chuan a awi duh tlat lo va, ‘Chuti takin Buia hi a zaithiam hlei lawng nge, miten an hmuhsit em avang hian tihnawmnah nan mai mai an sawi thin a ni ang,’ a ti tlat thin a. Vawi khat chu Buizova lawm rawih niin Buizova nu chu a feh ve a, lo an han thleng a, an bung dawn ta a. Buizova nu chuan, “E, Buia, miten i zaithiam thu hi an sawi an sawi a, i zai lah chu ka la hre ve ngai si lo va, tun tum chu i zaithiamzia ka hre ve duh tlat mai,” a ti ta a. Buizova lah chu a zai mai duh bik lo va, chutah le, a nu chuan, “I zai hma chu ka bung lovang,” a ti ta tlat a.

Buizova chu zai turin a inbuatsaih ta a, a lawmte ho chuan tih danglamin an awm leh dawn tih an hriat lawk avangin thingbul vawn tur remchang an hmuh ang angte chu an vuan ta ran hlawm a. Buizova nu chu thingbul rem chang vuan ve tur in an ti a, nimahsela a vuan ve duh chuang lo va. Chutah le, Buizova chu a rum tan ta der der a, zai tuma an hmm...hmm.. lai chuan an vau a thing tang ro chherawpah chuan thuro hi a rawn fu chat a, a rawn hram ta kar kar a, Buizova chuan thuro chu thlir chungin ruahtham loh hla a rawn chham chhuak a, a hla thluk pakhat nilen zai thlukin an sa ta mai a !!

“Ka vauva thuvate, i hram lai bang teh aw,
Kei pawh Lalngo ngaia ka tah ni tam e,”


a han ti ta mai a. Chutah le, a lawmte ho lah chu an tha a zawi zo va, thingbul vuanin an thuding zawi ngiai hlawm a, chakna reng nei lo ang mai hian Buizova zai lai chu an thlir a. Chutihlai chuan Buizova nu chu thingbul vuan a tanhmun te lo siam lawk ve hek lo, a tha han zawi thut kha inveng hman hek lo le, a lum ta a. Lo lah chu a awi ang reng si a, lo mawng thleng rawkin a lum ta a. A pawnfente lah chu a tla hrang rem rum a, Buizova chuan hmanhmawh takin a nu lum chu a umzui a, a pawnfente chu a chhar a, a nu bul a zu thlen chuan, “Ka nu, ka nu, eng nge i an , i na em ?” tih pahin a nu pawnfente chu a pe a. A nu chuan eng danga chhang lovin a pawnfen chu fen that mawlh mawlh pah hian Buizova banah chuan a vuan a, “Buia, kei ni angte chu min duh ve awm si lo va,” a lo ti a. Buizova chuan mak tih hmel takin a nu chu a en a, “Duh leh duh loh han sawi tur em ni kan nih le, i dam a, na i neih loh chuan tirawh, thlam lamah i chho vat teh ang khai, kan thiante ho pawh an lo hrilhhai rei lutuk ang e,” a ti a. Tichuan, Buizova nu chuan a fapa zaithiamzia chu a lo hre ve ta a.

Chawngtui atang chuan Buizova te chhungkua pawh mi tam zawk te hnung zuiin thlang an rawn tla ve ta zel a, Hmuifang tlang Chawngtui hmunah te, Reiekah te, E.Phailengah te a rawn awm thla zel a, hla te a phuah zel bawk a. A lo upat deuh hnu chuan a zai tlem ve tial tial a. A hun tawp lama a zai miten an sawi reh theih loh pakhat chu, E.Phaileng khaw bulah hian vawikhat chu Buizova lungleng hi sunhlu kungah a lawn a, duhthawh tak maiin a zai rum ta hlerh hlerh mai a, a zai chuan thlifim a ko va, thli a rawn thaw ta her her mai a, sunhlu hnah chu a rawn chhem til ta er er mai a ni.

powered by Blogger | WordPress by Newwpthemes | Converted by BloggerTheme