Chakai Meichher Chhit
12:18:00 AM
Noddy
, Posted in
Mahni vei zawng zawng sawi hian phul leh hlut thin ila a ni mai. Ziak mi han nih a ngaihnawm deuh zawk a nunhlui han thaichhuah pawh a chakawm viau laiin chutiang chu ka ni der si lova.Anih ang ang hian dah ve leh tawp mai teh ang. A lem awm hi a zia awm deuhvin ka hria. Chuvangin Internet lama mi hi kan dah mawi ve mai mai a nge..
Chakai khawrh, meichher chhit etc. hi nuam ka ti ve thin khawp mai a. Nikum hmasa lam phei kha chuan kan awmna atanga hla vak lovah mahniin chakai meichher chhit turin ka chhuak ve rawih mai a. Tlai lamah scooter-in link road lam tluang zawhin iptepui leh ka mamawh tlem a zawng nen kawng biboh karah kan insawh thla ve nawk nawk a. Kawng sir remchang laiah ka innghat a.Hnim pik te tawn kaw chawpin ka chhitna tur hmun chu lui hnar lam atangin ka zawh thla ta a. Zawh thlak pahin chakai duhzawng deuh ni a min an sawi Broiler chaw chu a rem lai laiah ka theh thla pah zel bawk a. Ka duhtawk chin ka thlen chuan khua nghak thim turin mei te chhemin ka innghat ta a.
Khua a thim dawn ruai tawh ang tih chuan ka thlang lawk tui khuah atang chuan rul lian tawk hi rawn chhuah tumin a rawn lawr ta zuau zuau mai. Kei a rul hlau tih takah tihngaihna vak hre lo chuan ka meichhem lai thingthu nung chuan kan vawm ve pawp mai a. A hlau bawk a niang a pil leh a a reh ta vang vang a. Ka piah deuh ah chuan hmawng kung sang deuh zuih mai a ler lam buk tawi laih chu a awm bawk a. Khua lah chu a thim har hi ka ti tawh khawp mai a. Chu hmawng kung chu ka thlir dauh dauh mai a. Ka ngaihtuahnaah chuan ramhuai an tih ang chi emaw bawmpek an ti zawk emaw ni te tan chuan chulai thing kung chu nunchan zir nan hian remchang awm hle hian ka hriatpui a. Chutia ngaitha lo deuh a ka thlir reng lai chuan ral khat atang hian thawm ka hre ta. Lo feh haw tlai fal deuh ni ngei tur zai al al thawm a ni tih kan hria chu ka thaw huai mai a.
Hlauh nei lo chu ka ni bik miah lo. Ka awm tinuam lo tu deuh chu chulai thingkung ka hisap ta vak chu ni berin ka hria. Mahse engmah han hlauh tur chu ka hre chuang hlei lova. Khua nghak thima ka thut pah chuan eng eng emaw ka ngaihtuah kual a. Kan naupan lai a kan thianpa pakhat nen a chakai meichher chhit kan tum ve tum te ka ngaihtuah thleng a. Rampalailengah tuma lawm lohvin ka nui chhuak vur vur mai a. Chutih lai min hmutu chu awm se chuan mi a emaw min ti ngei ngei ang
Tumkhat chu Class-IV kan zirlai hian ka thianpa pakhat nen hian kan tuichawi thinna tuikhur mawngah chakai meichher chhit ve tumin kan insiam ve a. Kan tuikhur hi khua atang chuan km 1 leh a chanve vel chu niin ka ring. School ban veleh ka pa hnenah chuan kan tum dan chu ka sawi a. Ani lah chuan in kal thei lovang tiin min lo hnial nasa mai a. Anih leh ka rawn kal ve a nge te a la ti tak deuh deuh a. Kei lah chuan a rawn kal ve kha ka duh der mai si lo. Chutia tum lui ta tlat chu chaw te fun ula a tih pawh chuan ka duh chuang lo. Ka ril a tam tlat loh avangin a ngailo ka la ti ta zel a. Mahse, chaw tel lo chuan kan chhuah a phal tak loh avangin min fun luih sak ta a. Meichher tur pawh chu in siam thiam lovang a ti a, amah chuan mau a zawng a khawnvartui min thun sak a, chhit mai tur in min peih sak ta diam zawk a. A tihdan tur te min hrilh a, ipte nen nawalh nen chuan thianpa te inlam pan chuan ka in ak chhuak ta a.
Kan phur dun bawk a, tha tho tawkin dai lam pan chuan kan inak chhuak dun ve ta hnak hnak mai a. Khua atanga hla vak lo kan thlen chuan kan meichher ken chu a alh thei dawn em tiin hal chhin kan chak ta tlat mai. Ka ipte atang chuan nawalh chu kan phawrh a. Kan han dep kai ta a. Alo alh thei na meuh mai a. Tihhlum leh kan tum pawh chuan kan beidawng der a ni. Lei vuak nan kan hmang thul, A chang leh kan han rap, kan thing vak vak bawk a. Kan sawisa nasa ta deuh a niang a mau bur pawh chu kan tih keh then ta. Mau keh lai sir atang te chuan mei alh chu a lo chhuak ta zel mai si. Vanneih thlak deuh maiin a hnawhna (phita) chu mau atang chuan a tla chhuak ta hlauh mai. Kan hlauthawng dun nasa mai a. A hnawhna tla chhuak kha a la alh nasa mai bawk sia. Ngam leh ngam lovin kan tum hlum thei ta a. Mau chhung kan han en chuan khawnvartui tihtham a lo awm ta bawk si lova. Nui hawk hawk chungin inlam panin kan haw leh ta ringawt a. Chhungte kan han hrilh chiah chu an nuih a za ngei mai. Chutiang vel ngaihtuah chuan khawhar lutuk lovin khua pawh chu ka nghak thim ve ta a.
Khua a thim fel ta maw tihah chuan ka insiam a, meichher te ka chhi kai a, luidung chu ka zawh chho tan ta a. Chakai sa hi ka ei duh vak pawh a ni lo nuam ka tih vang in ka zuk chhit ve mai mai hi a ni a. Naupang leh hmeichhe sa an tih a bawppui tih loh hi chu ka ei tui vak hlei thei meuh lo. Tumkhat KTP in bial dang kan tlawh tumin chawlhni a an chakai sa min hmehpui kan thian dun a ei har kan tihzia te min ti hrechhuak rum rum mai a ni.
Ka rinai takin chakai pawh an lo lian a. Chhungtlai chu ka hawn ve ta hlauh a. Fate ho lah chuan an lo lawm phian a. Bucket a kan dah chu an khai kual deuh sek mai bawk a. A hlimawm ve duh angreng khawp mai. A tuk zing a nu ber chakai chhum tum kei Inti ramkal hah tak mai a khumlai zawla mumang rama ka chen veng veng lai a ani chakai man ngam si lovin min han kai thova. Mahni mansa mahni bawkin ka han chhum leh takah chuan chakai meichher chhit pawh hi tihfo chi niin ka hre ta meuh lova. Chuta chin chu chhit lova mi mansa lo leisak mai hi a hah dam ta ber a ka hriat avangin ka chhit duh ta lo reng reng a......
A ngaihnawmin lung a tileng khawp mai. Chakai meichher kan chhit nasa thin bawk a, tun thlengin ka la châk reng. Thianho, panga paruk velte nena lui lian tham leh thui deuhva chhit hi a nuam, 1000 dawnte kan man thin. Bo hi kan chîng em em mai bawk a, sawi tur ka nei nual. Ka hman deuhvah ka la ziak ve ang, i post vangin thil dang tam tak pawh ziahna chang ka hriatphah dawn e! Chakai hi a ei ai chuan a man hi nuam ka ti zawk bawk. Ka chhiar thuak thuak rih.
A ngaihthlak nawm mai mai mange, thuziah i thiam hle mai, kan hun kal tawh te min thlir tir a, lung a leng thar mange aw!!! Chakai meichher chhiat hian vawi 3 vel chu thiante nen kan chhuak ve tawh a, a nuam khawp mai. A vawikhat phei chu, thiante hnungah mahni chauh te nena lo in bengberek phei kha chu, heta sawilan tlak pawh anilo e, hahahaha. Chakai chauh nilo, Chengkawl meichher chhit pawh vawi 4,5 vel chu ka kal ve tawh, thiante nen bawk, a hun lai ani bawk a, kan vannei a, ei zawh chu sen loh, zawrh tham lawih leh Iptepui a, rit lawih thama ah tur kan neia, a hlimawm khawp mai.
Lui kal leh ramchhuah hrim hrim hi nuam ka tih ve zawng tak ania, chawhmeh vai a, tumbu, aidu, raw tuai khawrh, thangkam eng eng eng emaw tih te kha tun thleng hian ka lung min la len a, ka kal chak ber thin pakhat ala ni bawk,.. I post tha khawp mai, hetiang lam chhiar hi nuam riau,...
A ngaihnawm reuh kati,kalo khawngaih reuh lutuk che u,in khawnvartui theih nghilh in let leh hnak hnak hi,ka hrethiam tam vaklo a, chakai meichher chhit dante ka hriat phaha,in thian duna nuam in tih dan tur hi kalo share pui che u. naupan lai hi sawi anuam kati keipoh thin.chak ai hi mahse kala ei ngailo a,atui dan tur a kalo ngaih chu a bawppui hi anih ka ring,chhiar aman hla khawp mai.i blog poh anawm reuh hi.
Anchiri te pawh in man tel nual lo maw..
A ngaihnawm in lung iti leng! Dawih deuh chu hruai chi loh:-) Chakai chil hi ka haw tlat pek a.
A va ngaihnawm reuh e. Chhiar pahin ka nui tet tet mai. Thim hlim vela mahni chauhva ramhnuaia thut chu a nuam lo khawp ang a.... a nawm loh ka ring khawp mai. Luikal leh ramchhuah hi nuam ka ti hle thin a, mahse zan lamah chuan lendenga ka chhuak tih loh chu, chakai chhit tih lampang hi chuan ka la chhuak lo reng reng. Zep miah loh ah chuan chakai man hi ka peih vak lo, min chep thin a......
TSa, in man hnem awm thin hle mai. Thiante nen a kan man tam ve ber tum chu chakai 40 leh satel pakhat kan man tum kha a ni. ka blog te min rawn tlawh sak thin piah lamah comment te min rawn pek thin avangin ka lawm nawn e.
Hmelthatea David, min fak derna avangin ka lawm lutuk e. I blog a i thuziak te ka chhiar hian thuziak lamah na na na chuan i ne pawh ka ek lo a nih hi ka inti. Ramchhuah leh luikal lam hi keipawh ka nuam tih ber te an ni ve tlat. Chengkawl hi ka la chhit ngai loh avangin engtinnge an man dan chiah pawh ka hre lo na a, li mawng vel ah an awm thin niin ka lo hria a. Chuvangin Chengkawl chhit chuan kan huh zawr duh awm mange te ka lo ti mai mai. Min rawn tlawh thin avangin ka lawm e.
omom, nangpawh i lo lenglut a ka lawm. I rawn leng fo thin dawn nia.
Alexxfender, anchiri tangkaina ka hriat loh chu thuhran nise Anchiri hming tak ngial pawh kha khatihlai kha chuan ka la hre lova. Lo hre tawh ni ila chu tlem a zawng tal chu man haw ngei ka tum in ka ring...lol.. Engpawhnise, ka blog te i rawn tlawh ve avangin ka lawm tho tho e..
Sekibuhchhuak I ti lawmawm. Lo leng fo turin ka sawm nghal a che. Chakai chil huat hi a tha riau. Haw lamah thianten an ah par par laiin zangtein a haw theih bik a..hehehe..
Caribou Ka blog mi i rawn hlut der sak thin hi ka lawm thei khawp mai. Nia chakai man hrehawmna ber chu a cheh hi a na hi a ni. Taka, in zawt tawp mai ila, i mail min hrilh mai thei em le?
Ka nuam tih thin i sawi a, kan tih ve thin lai mitthla pah zelin ka chhiar. A lunglen thlak kher mai.
Chakai sa tui ti vaklo ka hre khat hle mai. Kan nu hian kum 2 emaw kalta atangh khan a hua a (allergic)a eichak reng ala reh lo mai bawk a hehehhe
Chengkawl mei chhir chhit chu, lui chhungah awm loin, lungah hian an bet teuh thin a, lung han ti ila, tui chhungah niloin, lung(pui)tui chim chin emaw, pawn deuh a lung awm thin ah khan, nuai thlak hlawk hlawk mai tur ani e, Chengkawl pa chauh man i duh chuan, chengkawl nu pawngsual teh ang, ti la, a nu ho chu an bibo vat mai ang, :)
Ngaihnawm lutuk! Kava telve chak ve aw. Ka la hmanlai teh ania aw. Vawi tamtak ka chhit tawh. Chakawm hle mai.
lung i tileng hle mai. Kan tleirawl lai chuan ka chhit ve thin a, mahse ka ramvachal lo khawp a, ka lung a leng ru deuh thin..khaw thim dawn hian.
Krista roluahpuia & RP Pachuau, ni e chakai meichher chhit hi nuam ve deuh chu a ni. In rawn lenglut a min ti phuisui.. Comment te min han hnutchhiah sak thin hi chu ka lawm tak tak a ni..
H.Vangchhia, chakai sa hi a duh tak tak chuan an duh thei khawp mai. High School kan kal laia kan miss khan chuan chakai hi a engmah hi a paih nga lo. A ei vek zel. A tirah a ek leh a kawmkawraw leh ke tang vel te hi ei nghal lovin a rep phawt a. A hnu ah a rawt a, a ei zo leh vek zel.hihihi..
Keipawh ka ei hian a chang chuan ka thak sep sep zel, te reuh te te hian ka bawl bawk thin. Mahse, ka ei lui zel tho chu a nih hi. Ka blog a ka thuziak te min chhiar sak thin piah lamah comment te min hnutchhiah thin hi chu ka blog min tihphuisui phah thin khawp mai.
I ziak ngaihnawm hle mai. Chakai meichher hi vawi hnih chiah ka la chhit, mahni phei chuan ka chhit ngam teuh lo.
Zan thim zinga ramhnuia mahni chauha kal ai chuan chakai ei loh ka thlang ha ha
In meichher hal tal buai vel khi ka hmu chak, in ninhlei ve thawt thawt hmel ngawt mai :-)
Ka blog hi update tuein password ka theihnhhilh tawh a, a buaithlak ngei mai.. @Triplestar min rawn tlawh ve avangin ka lawm e.