Zirlai Pawimawh
11:53:00 PM
Noddy
, Posted in
Hreipui pu chungin min rawn pan zel. Min endan lah chu a rum zek lehnghal. Ka bul a rawn thlen chuan chhak lam kawh pahin “Khilai a thing khi ka kit dawn?” a rawn ti teh hawl a. Kei lah chuan “Khawia thing maw?” tiin ka lo zawt let nghal a. Ani lah chuan zam map lo thinur aw lek lek in “Khi..khilaia Kangtek khi..Ka ram a nia, ka kit dawn” thupe aw lek lek zawk mah hian min rawn tih khum ta mai . Chhan mai ngaihna pawh ka hre lo. Kan ram chhung (Sawrkar ram) a ni tih ka chiang ropui mai si. Awka vin deuh a ka chhan dawn chuan inhnial a cho tih ka hrereng mai si a. “E!! i thu a lawm le!” tiin bung ang reng deuh in kan chhang ta ngawt pek a. Ka rilru tak chuan a tih ngam ka ring miah lo. A tum ber chu min rawn tih thinur kha ni ber in ka hria.
Kum lamah chuan kei aiin a u zawk tih chu ka hria. Chuti ni lo sela chu ‘I duh duh ka duh’ han tihpui nghal na mai tur khawp a tawngkam dengkhawng a rawn chhakchhuak tlat! Han sawi zui zel tur kan van dun khawp mai. A beisei loh deuhva ka lo chhan vang kha ni maw. Ngawi rengin engngemaw chen chu kan han ding dun ran mai a. A hreipui put lai chuan min hem chawrh ang tih ka hlauh deuh vangin ka hnung chhawn mai duh bik lova. Chutah, a inher a a kal ta mai a. ‘A kit ngam miah lovang, a tawng dan atang reng khan min rawn chhaih kual vel a tum mai mai a ni’ ka ti rilru a. Engngemaw chen hnu ah chuan Kangtek thing a kawh ngei mai kha a chek ta chawrh chawrh a ni tih ka han hmu ta! Heti a nih chuan buaina chu ka pumpelh thei dawn ta lo tih ka inhre chiang ta khawp mai.. Engpawhnise, han kal nghal a ngai tlat. A kih tluk tak tak chuan a hnuaia thlai leh thirhrui (Electric hrui) a vaw chhe ngei ngei a nga. Thil pawi zawk a thleng dawn tlat a ni. Ralkhat atang chuan cheh paha alo hawi thla leh thin pawh ka han hmu thei a. Engtinnge ka tih dawn tih a hre chak tih a lang reng mai a.
Hmanhmawh vak lo anga lang in hman hmawh ru ang reng deuh si chuan a awmna lam chu ka pan chho ve ta a. Ka han thlen chuan a lo sat rek ngut hman tawh a. Duhtawk tur a kan ngen chuan helai ram buai lai hi a ram ngei a nih thu te min lo hrilh nghal a. Chuvang chuan thing pawh kih ngei a tum a ni. Heta a hriat loh em em chu kei ni (Sawrkar) chuan patta fel takin kan nei thlap a ni. Ani chuan a pu te ram hlui tih vel kha a tan chhan chu a nia. Mahse, a neitu angah a inngai miau sia kan buai phah ta a ni ber mai.
A thil tih pawi theih dan tur te tha taka kan hrilhfiah hnu chuan a hrethiam ve ta deuh a. Mahse, a bul vel hi vah ah ala vau ta cheu mai a. Ka thin chu a ur ru tawh khawp mai. Ka la insum hram hram a. A ram leilung chhiatzia leh vat mahse engmah a thar dawn chuang lo a ni tih kan hrilh takah chuan dik a ti bawk si. A tihngaihna hre lo chuan a ramchhung area nia a ngiah chinah signboard tar a pawt thla lo turin min ti ta a. Chu erawh chu ka remtih sak a. Nui hak hak chung chuan kan inthen thei ta hram a ni.
Heta ka sawi tum ber chu ‘Chhanna Nem in Thinur A Tikiang’ tih hi a tak in ka hmuh phah a. Thinrim takin lo chhang ve nghal ila chu keini pawh hi kan buai phah zawk ngei ang. Mahse, zaidam tak leh awka nem tak chunga kan chhan hian midang kan hneh theihna awlsam ber a lo ni reng tih min hriat thar tir a. Kei ngei pawh hian zir tur ka ngah hle a ni tih ka hriatchhuah phah ta hlauh zawk a ni.
A dik khawp mai. A paragraph tawp ber ka chhiar thlen hma chuan thawnthu tawi ringawt emaw ka ti dawn a, paragraph tawp ber ka chhiar thleng a, thawnthu tawi tha zet a nih hi ka ti leh ta zawk a! Hetiang lampang thuziak, entirna leh tehkhin thu emaw hmanga ziak hi ka ngaina khawp mai. A tha lutuk ringawt; ziak zel rawh khai.
Word verification hi paih daih rawh! Ka phone atangin ka hmu tham miah lo a nia. 'Bakah net a chak vak lohvin a lang kim hleithei lo tlat!
Tsa, nia word verification chu paih kan tum dawn chhin a nge. Ka thuziak min rawn hlutsak avangin ka lawm e.
Sorkar hian mahni ram theuh, a nihna ang taka enkawl tur leh, thlai te ching a uluk leh fai taka enkawl turin thupek khauh tak chhuah chhin ta se, ram enkawl loh, thlai pawh chin miah lohna ram chu cancel sak hmiah hmiah ta mei se chuan, mirethei ram nei ve phak lo tan hian ram neih ve theihna chance tha tak a inhawng ang maw le.
Chhanna nem tak leh awka zaidam tak hi chuan thinurna a tikiang thei tia tlipna i rawn siam khi, i titha khawp mai. I thuziak a ngaihnawm khawp mai.
Ni e, Caribou i rawn sawi hi a dik ka ti kei pawh. Ram enkawl tha lo chu an ram pass cancel sak hmiah zel se, chu ram cancel chu NLUP scheme ah telhin ram pawh nei zo ve lo te hnenah sem se, sumin vur bawk sela kan changkang hma zawk a ngem aw te ka ti ve mai mai..