Hrethiam Ve Se Chu Aww..

          A vawt ka tih vangin khumah ka mu meng kar reng a. Chutihlai chuan ka mobile phone a lo ri ral ral a."Kan bawng thlun kha a bo daih a nia, lo phei ve vat teh" Chu thu ka hriat rual rual chuan vawt ka tih reng ka hre tawh lo, hmanhmawh taka inha lumin ka zuang tho nghal hi a ni ber mai a. Nizan lama kan bawng thlunna lam pan chuan hmanhmawh takin ka phei ta nghal a.
        
          Kan bawng thlun kha kan veng Krismas ruai a talh tur, farm pahnihin karhnih chhunga kan invulh chhawk tur Agriculture Farm lamin an vulh hun chhung a tawp a, keini Horticulture Farm in kan vulh ve hun a nih vanga nimin lama kan va kaih phei chauh a ni lehnghal Ka rilru-ah thil hrang hrang a lo lut a. A bo vaih chuan a va zahthlak dawn em.. Kohhran mipui hma-ah kan hmai a uang hauh lovang le. Tin chawi hial pawh a ngai maithei a ni tih te thlengin ka rilru-ah a awm nghal a.

       A hma zan lama kan thlunna hmun chu ka va thleng phei a. Inti detective takin a  hniak vel chu kan en a. Nghet takin kan thlung ni a kan hriat kha talna hnuhma pawh awm lovin a bo hawl mai niin a lang a. A thlanglam hnim vel kan en lah chuan a kalna hnu awm reng reng ka hmu bawk si lo. A bangbo theih ngei mai. Mahse thil pakhat chiang deuh chu a thlang ram lama a kal vaih chuan kan inzawng fe chung pawhin kan hmu zo lo mai ang tih hlauhawm tak a ni a. Amaherawhchu kawngpui lama a kal hlauh a min an lo kai daih a nih loh chuan hmuh leh mai a awlsam deuh zawk ngei anga. Chuti a nih lohva misual tuin emaw a lo kai daih a nih vaih chuan chan hlen mai theih a ni bawk si.

       Kan han sawi ho a, kawngpui lama zawn tawp phawt mai chu fuh berin kan hria a. A zawng tura kan insiam lai chuan Agriculture Farm lam atang chuan bawng chhuak an thlun thu kan hre ta hlauhva, hmanhmawh takin kan va kal nghal a. Kan bawng bo ngei a lo ni hlauh, a va tihzia tak em. Rilru a hahdam ta huai mai.

       Mahse tizawng hian ka ngaihtuah ta tlat mai a. An nun an hlan loh chuan kan hlim zo ve ta lo. An tello chuan kan hunpui hmuah hi a kim zo ta tlat lo mai. Tawrhna nasa tak a thleng dawn tih in hrethiam ve se chu aw... engtin chuan ngai ang maw..Pian loh zawk pawh an duh ve rum rum ngei ang le.. 

        Amaherawhchu Ani chuan engkim hrelawk vekin kan tan a lo piang a. Vankhawpui an committee pawh khan kal tur an inhmu zo lo mahse kan tana zalenna inhawng tur chuan a fapa mal neih chhun a rawn hlan ta. Kan tana thi khawp hiala a tawrh tur pawh hre lawk chungin a lo piang dawn ta. He hun hi engtiang a lo hmuah nge i tum ve le??

Note : Ka Blog min rawn tlawh sak thin tute inzavaiin Krismas leh Kumthar Chibai vek u le..
          

3 Response to "Hrethiam Ve Se Chu Aww.."

  1. caribou says:

    Nang pawh krismas chibai le.

    Bawng khian a hmalam hun a hre lova, lungawi takin hnim a pet thei a, a thih dawn thlengin thlamuang takin a nung ngei ang. Chutiang bawkin keini pawh hian kan thih hun tur kan hre reng reng si lo. Mahni thih hun tur kan hre lo hi kan vanneihna pakhat a lo ni.

    A tawp i kharna hi a va tha kher ve le. Sermon tha tak thlakna tham chu ani chiang mai.

    Noddy says:

    Caribou, ka thuziak te comment tha tak tak min pe thin a, ka lawm hle mai.

    Hei blog ka nei tih pawh ka hrechang tawh lo, mahni tul tulin ka tul ve a. In blog chu sawi loh mahni blog pawh tuaihnumna chang ka hre tawh hek lo. Chuti chunga comment tha tak min la rawn hnutchhiah zui avang hian min tiphurin min tihlim hle mai.

    Pu Caribou comment chu a dik leh thlap mai. :D Kumthar chibai le...

Post a Comment

powered by Blogger | WordPress by Newwpthemes | Converted by BloggerTheme